Fransada küçələrdə yaşayan insanların sayı kəskin dərəcədə artıb - Hesabat
Paris, 7 fevral, AZƏRTAC
Mənzil Fondunun dərc etdiyi hesabata görə, Fransada 350 min insan küçədə yaşayır və bu, son illərdə 2 dəfə artıb.
AZƏRTAC xəbər verir ki, Fransada hər axşam minlərlə qadın, uşaq və kişi küçələrdə yatır. Mənzil Fondunun kasıbların küçədə və ya acınacaqlı şəraitdə olan mənzillərdə yaşadıqlarını əks etdirən 30-cu hesabatı ölkədə mənzil böhranının çox dərin olduğunu göstərir.
Hesabatda küçədə yaşayanların sayının iki dəfədən çox artdığını vurğulanıb. “Əyilməz Fransa” (LFİ) partiyasının üzvü M. Pano Prezident Emmanuel Makronun hələ 2017-ci ildə seçki kampaniyasında bu problemi kökündən həll etməyə dair vədlərini təkrarlayıb. Ancaq bu müddət ərzində problemin həll edilmədiyi və əksinə, küçədə yaşayanların sayının çox sürətlə artdığını diqqətə çatdırıb. Ölkədə 203 min mənzilə təcili ehtiyac olduğu bildirilir. Hazırda Fransada küçədə yaşayan 350 min insanın qeydiyyatda olduğu və bu rəqəmin ötən illə müqayisədə 6% artdığı qeyd edilir. Həmçinin Fransada 4,2 milyon insanın mənzil şəraiti son dərəcə pisdir.
Üç yüz əlli səhifəlik hesabatda əlilliyi olan şəxslərin də problemlərinə toxunulur, yeni tikilən binaların 20 faizinin əlil şəxslər üçün uyğun olmadığı bildirilir.
“Küçədə ölənlər” (les Morts de la Rue) Assosiasiyasının hesabatına görə, 2023-cü ildə Fransa küçələrində 735 nəfər ölüb və bu rəqəm son bir ildə 15 faiz artıb.
Bölmənin digər xəbərləri
