Fransanın köhnə-yeni silahı - demoqrafik tərkibin dəyişdirilməsi ilə aparılan soyqırımı
Paris, 30 mart, AZƏRTAC
Fransanın müstəmləkələrində demoqrafik vəziyyəti dəyişdirmək siyasəti onun müstəmləkə tarixinin mühüm xüsusiyyəti olub və hələ də davam edir. Əsrlər boyu Afrika, Asiya, Karib hövzəsi və Sakit okeanda geniş ərazilərə nəzarət edən Fransa iqtisadi, siyasi və mədəni maraqlarını təşviq etmək üçün tez-tez bu bölgələrin demoqrafik tərkibinə təsir göstərməyə yönəlmiş siyasət həyata keçirib və bu gün də yürüdür.
Fransanın öz müstəmləkələrinin demoqrafik xüsusiyyətlərini dəyişdirmək üçün istifadə etdiyi ən geniş yayılmış üsullardan biri fransız əhalinin bu ərazilərə məcburi və ya stimullaşdırma yolu ilə miqrasiyasıdır. Bu, ilk növbədə, aktiv müstəmləkəçilik dövründə - Fransanın öz varlığını isbatlamağa və müstəmləkəyə çevrilmiş bölgələrin təbii ehtiyatlarını istismar etməyə çalışdığı zaman daha geniş yayılmışdı. O vaxt fransızlar müstəmləkələrdə məskunlaşmağa həvəsləndirilirdi. Çox vaxt maddi təşviq və ya pulsuz torpaq sahəsi verilməsi ilə həmin ərazilərə gətirilən fransızlar sayəsində həmin bölgələrin etnik və mədəni tərkibində əhəmiyyətli dəyişikliklər baş verdi.
Fransız köçkünlərin miqrasiyası ilə yanaşı, koloniyalardan da Fransanın özünə işçilərin immiqrasiyasını təşviq etmək üçün tədbirlər görülüb. Əsasən Şimali və Sub-Sahara Afrikasından olan bu işçilər kənd təsərrüfatı, tikinti və istehsalat sahələrində işləmək üçün idilər, onlar Fransa iqtisadiyyatına töhfə verirdilər.
Miqrasiya siyasəti ilə yanaşı, Fransa müstəmləkələrində yerli əhalinin artımını da nəzarətdə saxlamağa çalışırdı. Bu, bəzən məcburi sterilizasiya və ya doğuşa nəzarət kimi məcburi tədbirlər vasitəsilə həyata keçirilirdi. Bu siyasət tez-tez irqçi və ya Yevgenika metodu kimi vasitələrlə motivasiya edilirdi. Məqsəd yerli əhalinin say artımını məhdudlaşdırmaqla Fransanın müstəmləkələri üzərində siyasi və iqtisadi nəzarətini möhkəmləndirmək idi.
Xülasə, Fransanın müstəmləkələrinin demoqrafik xüsusiyyətlərini dəyişməyə yönəlmiş siyasəti onun bu regionlar üzərində siyasi, iqtisadi və mədəni nəzarətini möhkəmləndirməyə istiqamətlənmiş müstəmləkə layihəsinin mərkəzi elementidir. Bu siyasət müstəmləkə icmalarının tarixində dərin və uzunmüddətli izlər qoyub, bu gün də davam edən demoqrafik vəziyyətin və sosial dinamikanın formalaşmasına kömək edir. Yeni Kaledoniya, Martinika, Korsika kimi ərazilərdə demoqrafik dəyişikliklər siyasəti bu gün də davam edir. Son vaxtlar Martinika bu baxımdan diqqəti daha çox cəlb edir.
Martinikada son günlər vəziyyət gərgin olaraq qalır. Yerli əhali Herve Pintonun həbsinə etirazlarını bildirir və onun dərhal azad olunmasını tələb edirlər. Feliks Deder Qratın varisi olan Herve Pinto əcdadlarından ona miras qalan torpağı tələb edir. Ona məxsus bu torpağı qarət etmək azmış kimi, onun oraya getməsinə də qadağa qoyulub.
Herve Pinto əcdadlarından ona qalmış 16 hektarlıq torpağa yiyələnə bilmir. Martinikanın ən gözəl yerlərində fransızlar yerləşdirilib. Buraya köçürülən fransızların hüququ isə yerli sakinlərin hüquqlarından çox üstündür. Əslində, yerli sakinlərin hüquqlarına demək olar riayət edilmir. Bunu Herve Pintonun timsalında aydın görmək olur. H.Pintonun torpaqlarını qəsb etmək azmış kimi, ona bu kəndin ətrafında dolaşmaq da qadağan olunub.
Ancaq H. Pinto bu torpaqların sahiblərinin varisi kimi onları heç kimə güzəştə getmək istəmir. “Mən hüquqlarıma hörmət tələb etdiyim üçün həbsdəyəm? Mənim mübarizəm qanunidir. Bu, mənim babamın torpaqlarıdır. Məni 50 il həbsə qoya bilərsiniz, amma insanlığımı əlimdən ala bilməzsiniz, razılaşmaq olmaz. Martinika xalqına hörmət edin, mənim qətiyyətim tamdır!”, - deyə H. Pinto vurğulayıb. H.Pintonun inadla öz hüquqlarını tələb etməsi onun 3 dəfə həbsi ilə nəticələnib. Sonuncu dəfə SEM radiosunun proqramına qatılan ictimai fəal elə studiyadan çıxarkən Milli Jandarm Müdaxilə Qrupu (GİGN) tərəfindən saxlanılıb.
Onun vəkili D. Monotuka məhkəmədə “Bu işdə ədaləti, həqiqəti qəbul etməyə cəsarətlənin! Gəlin qazanc güdməyi dayandıraq!” deyərək H. Pintonun azad olunmasını tələb edib.
Jandarmlar onun qadağan olmuş əraziyə getdiyinə görə həbs edildiyini desələr də, həmin vaxt H.Pinto tamamilə başqa yerdə olub və bunu sübut edən videolar var.
Martinika prefekti isə Trois-İlets ərazisindəki “La Pagerie” kəndi ətrafında hər hansı etiraz aksiyasını qadağan edib. Bu, bir daha Fransa müstəmləkələrində yerli sakinlərin acınacaqlı vəziyyətini əks etdirir. Martinikalılar yerlilərin sayının süni şəkildə azaldılması və gəlmələrin sayının artırılmasını Fransa dövləti tərəfindən onlara qarşı aparılan soyqırımı kimi qiymətləndirirlər.
Bölmənin digər xəbərləri
