QAN YADDAŞI
FRANSIZ DİLİNDƏ İNTERNET SAYTINDA XOCALI SOYQIRIMINDAN BƏHS EDİLƏCƏKDİR
AZƏRTAC xəbər verir ki, Azərbaycanlı Tələbələrin Avropa Forumu (ATAF) Azərbaycan həqiqətlərini, ən yeni tariximizdə baş vermiş böyük faciələr barədə məlumatları dünya ictimaiyyətinə çatdırmağı asanlaşdırmaq məqsədi ilə fransız dilində təbliğat-informasiya xarakterli sayt yaratmışdır.
Xarici Ölkələrdə Yaşayan Azərbaycanlılarla İş üzrə Dövlət Komitəsindən bildirmişlər ki, www.khodjali.fr saytı Xocalı soyqırımından bəhs edir. Saytda Xocalı şəhərinin tarixi, 1992-ci il fevralın 25-dən 26-na keçən gecə erməni millətçilərinin keçmiş sovet ordusunun 366-cı motoatıcı alayının köməyi ilə törətdikləri qanlı qırğın, bu şəhərin sağ qalan sakinlərinin faciə barədə dedikləri, soyqırımla bağlı xarici KİV-lərdə dərc olunan yazılar, hadisəni pisləyən rəsmi sənədlər, həlak olan və itkin düşənlərin siyahısı, foto və videomateriallar, eləcə də Dağlıq Qarabağ münaqişəsi barədə məlumat və digər bilgilər yerləşdirilmişdir.
ATAF bundan əlavə, www.20janvier.fr saytını da hazırlayır. Bu domen artıq alınmış və saytın üzərində hazırlıq gedir. Saytda 1990-cı il yanvarın 20-də Bakıda sovet qoşunlarının törətdiyi cinayətlər, günahsız insanların qətli ilə bağlı fransız dilində ətraflı məlumat yerləşdiriləcəkdir.
Daha sonra isə www.azerfrance.fr portalı yaradılacaqdır. Bu domen də alınmışdır. Portalda Azərbaycan-Fransa münasibətlərinə dair məlumatlar, eləcə də Fransadakı azərbaycanlıların, Azərbaycan diaspor təşkilatlarının fəaliyyətinə geniş yer ayrılacaqdır. Həmçinin Azərbaycanla bağlı yeniliklər bu portal vasitəsilə fransız oxuculara çatdırılacaqdır.