Fransız rəssamın “La Caverne” əsəri zədələnib, açılış təxirə salınıb
Paris, 3 iyun, AZƏRTAC
Fransız rəssam JR (Jan-Rene) tərəfindən Parisin məşhur Pont-Neuf körpüsündə həyata keçirilən “La Caverne” (“Mağara”) adlı müvəqqəti incəsənət əsəri zədələnib. Hadisədən sonra şənbə gününə planlaşdırılan açılış mərasiminin təxirə salındığı açıqlanıb.
AZƏRTAC xəbər verir ki, layihənin tərəfdaşlarının verdiyi məlumata görə, iyunun 2-də günortadan sonra əsərin üzərindəki örtük materialının bir hissəsi cırılıb. Sosial şəbəkələrdə yayılan görüntülərdə körpünün üzərini örtən konstruksiyanın altındakı şişmə strukturun görünməsi diqqət çəkib.
Hadisənin Parisdə gün ərzində müşahidə olunan güclü külək və yağışlarla əlaqəli olub-olmadığı hələlik məlum deyil.
Layihənin tərəfdaşları olan JR Atelyesi, Kristo və Jan-Klod Fondu, eləcə də Paris Körpüləri Dostluq Cəmiyyəti birgə bəyanatda bildirib ki, texniki və mühəndislik mütəxəssisləri hazırda hadisənin dəqiq səbəblərini müəyyənləşdirmək üçün araşdırmalar aparırlar.
Tərəflər zədənin miqyası və yaranma səbəbi barədə hələlik əlavə məlumat verməyib. Bununla yanaşı, hadisədən bir neçə saat əvvəl Parisdə güclü külək və leysan yağışların qeydə alındığı xatırladılıb.
Layihənin rəsmi açılışına dörd gün qalmış təşkilatçılar əsərin istifadəyə verilməsinin təxirə salınmasına qərar veriblər.
Bəyanatda qeyd olunub ki, “La Caverne” əsərinin açılışı iyunun 6-dan sonra keçiriləcək və yeni tarix aparılan texniki qiymətləndirmələrin nəticələrinə uyğun müəyyənləşdiriləcək.
“La Caverne” layihəsi ölçüləri ilə seçilir. İnstalyasiyanın uzunluğu 120 metr, eni 20 metr, ümumi sahəsi 2400 kvadratmetr təşkil edir. Qurğunun hündürlüyü isə müxtəlif hissələrdə 12 metrdən 18 metrədək dəyişir.
Əsər optik illüziya effekti yaradaraq mağaranın qayalı görünüşünü canlandırır. Bunun üçün ağ, qara və boz çalarlardan istifadə olunub.
Layihə piyadalar üçündür və ziyarətçilər tərəfindən ödənişsiz istifadəsi nəzərdə tutulur. Layihənin səs dizaynı məşhur elektron musiqiçi, vaxtilə Daft Punk duetinin üzvü olmuş Toma Bangalter tərəfindən hazırlanıb.
Bölmənin digər xəbərləri
