Futbol üzrə Azərbaycan millisi Antalyada Makedoniya ilə oyundan əvvəl məşqə çıxıb
Bakı, 26 mart, AZƏRTAC
Martın 26-da futbol üzrə Azərbaycan milli komandası Makedoniya yığması ilə yoldaşlıq oyununa hazırlıq çərçivəsində Antalyada məşqə çıxıb.
AZƏRTAC xəbər verir ki, məşq prosesində futbolçular isinmə hərəkətləri və topla məşqlər ediblər. Antalyadakı təlim-məşq toplanışında Kamran Ağayev (“Keşlə”), Rəşad Əzizli, Səlahət Ağayev (hər iksi “Neftçi”), Maksim Medvedev, Elvin Yunuszadə, Qara Qarayev, Coşqun Diniyev, Riçard Almeyda (hamısı “Qarabağ”), Ruslan Abışov, Namik Ələskərov, Rəhman Hacıyev, Emin Mahmudov (hamısı “Neftçi”), Ruslan Qurbanov, Ürfan Abbasov, Asif Məmmədov (hər üçü “Qəbələ”), Cavid İmamverdiyev, Tural Axundov, Rəşad Eyyubov, Amil Yunanov (hamısı “Sumqayıt”), Rahil Məmmədov (“Səbail”), Şəhriyar Rəhimov (“Kəpəz”), Araz Abdullayev (“Anortosis”, Kipr), Pavel Paşayev (“Oleksandriya”, Ukrayna) və Dimitri Nazarov (“Erzgebirge Aue”, Almaniya) iştirak edirlər.
Azərbaycan və Makedoniya milliləri arasında yoldaşlıq görüşü martın 27-də saat 20:00-da Antalyadakı “Mardan” stadionunda start götürəcək. Görüşün baş hakimi Halis Özkahya olacaq. Ona həmyerliləri Kamal Yılmaz və Kərəm Ersoy kömək edəcəklər. Matçın dördüncü hakim funksiyasını isə Ali Palabıyık yerinə yetirəcək.
Makedoniya futbolçuları da millimizlə oyundan əvvəl məşq ediblər. Rəqib komandanın heyətində 19 futbolçu - qapıçılar Stole Dimitrievski (“Gimnastik”, İspaniya), Deyan İliyev (“Arsenal”, İngiltərə), müdafiəçilər Stefan Ristovski ("Sportinq", Portuqaliya), Qoko Zaykov ("Şarlerua", Belçika), Kristian Toşevski, Darko Velkovski (hər ikisi "Vardar"), Kire Ristevski ("Vasas", Macarıstan), Visar Muslui ("Şkendiya"), yarımmüdafiəçilər Ariyan Ademi ("Dinamo" Zaqreb, Xorvatiya), Enis Bardhi ("Levante", İspaniya), Stefan Spirovski ("Ferensvaroş", Macarıstan), Boban Nikov ("Videoton", Macarıstan), Ezgyan Alioski ("Lids", İngiltirə), Maryan Radeski, Ferhan Hasani (hər ikisi "Şkendiya"), hücumçular Qoran Pandev ("Cenoa", İtaliya), İliya Nestorovski, Aleksandr Traykovski (hər ikisi "Palermo", İtaliya) və İvan Triçkovski (AEK, Kipr) yer alıb.
Makedoniya ilə qarşılaşma Qurban Qurbanovun Azərbaycan milli komandasının baş məşqçisi kimi üçüncü oyunu olacaq. Azərbaycan seçməsi yanvarın 30-da Antalyada təşkil olunan təlim-məşq toplanışı çərçivəsində Moldova yığması ilə qolsuz heç-heçə edib. Qurban Qurbanovun yetirmələri martın 23-də Bakı Olimpiya Stadionunda Belarus millisi ilə görüşdən minimal hesabla (0:1) məğlub ayrılıb.
Qeyd edək ki, Azərbaycan-Makedoniya yoldaşlıq oyununda VAR (video assistant referee) sistemi tətbiq olunacaq. Türkiyə Futbol Federasiyası (TFF) bununla əlaqədar AFFA-ya və Makedoniya Futbol Federasiyasına müraciət edib. Hər iki milli futbol qurumu TFF-nin müraciətini müsbət cavablandırıb.
Bölmənin digər xəbərləri
