Bakı, 3 dekabr, AZƏRTAC

Dövlət büdcəsi ölkəmizin iqtisadi və sosial inkişafını təmin edən mühüm alət olaraq bizə gələcək hədəflərimizi reallaşdırmaq, cəmiyyətin rifah halını yaxşılaşdırmaq imkanı verir. 2025-ci ilin büdcəsi dövlətin strateji prioritetlərinə, sosial siyasətinə və iqtisadi inkişaf planlarına uyğun olaraq hazırlanıb. Büdcə Azərbaycanın iqtisadi inkişafını sürətləndirmək və ölkəmizdə daha güclü iqtisadiyyat yaratmaq üçün nəzərdə tutulan mühüm layihələrin maliyyələşdirilməsini nəzərdə tutur. Bu, xüsusilə enerji, nəqliyyat və sənaye sahələrindəki infrastruktur layihələri ilə əlaqəlidir. İnfrastrukturun modernləşdirilməsi ölkə iqtisadiyyatının səmərəliliyini artırmaqla yanaşı, bölgələrarası balansı da gücləndirəcək. Belə ki, 2025-ci ilin dövlət büdcəsi layihəsində investisiya xərclərinin 2,7 milyard nəzərdə tutulması qarşıdan gələn ildə də regionların balanslı inkişafı proqramlarının davam etdirilməsinə imkan verəcək.

Bu sözləri AZƏRTAC-a açıqlamasında Milli Məclisin deputatı Azər Badamov söyləyib.

Deputat bildirib ki, dövlət büdcəsinin müzakirələri zamanı regionlarda həlli gözlənilən bəzi məsələlər qaldırılıb. “Hesab edirəm ki, investisiya xərcləri üçün nəzərdə tutulmuş maliyyə təminatı həllini gözləyən müəyyən məsələlərin icra olunmasına imkan verəcək. Dövlət büdcəsində işğaldan azad olunmuş ərazilərin yenidən qurulmasına və bərpasına 4 milyard manatın nəzərdə tutulması Böyük Qayıdışa dair Dövlət Proqramının uğurla həyata keçirilməsinə kömək edəcək. Ümumiyyətlə, 2025-ci il də daxil olmaqla, işğaldan azad edilmiş ərazilərin dirçəldilməsinə ayrılan 23 milyard manatın xərclənməsi sayəsində 100 yaşayış məntəqəsinin yenidən qurulması və bərpası işləri həyata keçirilir. Bu da 2026-cı ilin sonunadək 140 min keçmiş məcburi köçkünün öz doğma yurdlarına qayıtmasına yol açacaq.

“Dövlət büdcəsində sosial sahədə reallaşdırılması nəzərdə tutulan tədbirlər ölkə əhalisinin həyat şəraitini yaxşılaşdırmağa yönəlib. Büdcədə təhsil, səhiyyə, sosial müdafiə və əmək bazarının inkişafı üçün əlavə vəsaitlər ayrılıb. Gələcəkdə bu sahələrdə həyata keçiriləcək islahatlar gənc nəslin və yaşlıların daha yaxşı şəraitdə yaşamasını təmin edəcək. 2025-ci ilin dövlət büdcəsində 41 faiz sosial xərclərin nəzərdə tutulması büdcənin sosialyönümlü olduğunu göstərir. O cümlədən əhalinin sosial müdafiəsinin gücləndirilməsi üçün nəzərdə tutulan xərclərdə də artımlar proqnozlaşdırılır. Pensiyalar, təqaüdlər, işsizlik sığortası, sağlamlıq xidmətləri və sosial xidmət sahələrindəki layihələrin genişləndirilməsi hökumətin sosial bərabərliyi təmin etməklə bağlı iradəsinin göstəricisidir”, - deyə A.Badamov vurğulayıb.

Qeyd edilib ki, büdcədə əhalinin aztəminatlı təbəqəsinin, əlilliyi olan şəxslərin və pensiyaçıların da həyat şəraitinin yaxşılaşdırılması prioritet kimi qalmaqdadır. Dövlət Sosial Müdafiə Fondu tərəfindən həyata keçirilən sosial yardımlar və proqramlar bu qruplara daha geniş imkanlar yaratmaq məqsədi daşıyır.

Deputatın sözlərinə görə, ekoloji dayanıqlılıq və bərpaolunan enerji mənbələrinin inkişafı ölkəmizin prioritetləri sırasındadır. 2025-ci il büdcəsi çərçivəsində yaşıl enerji və ətraf mühitin qorunması sahələrində yeni layihələrin maliyyələşdirilməsi nəzərdə tutulur. Bu addımlar, həmçinin qlobal iqlim dəyişikliyi ilə mübarizə sahəsində Azərbaycanın beynəlxalq imicini gücləndirəcək. Belə ki, Azərbaycan dövləti 2030-cu ilə qədər istehsal edilən elektrik enerjisinin 30 faizinin bərpaolunan enerji mənbələri ilə əvəzlənməsini hədəfləyir. Dövlət büdcəsində bu sahəyə maliyyənin ayrılmasına imkan verilməsi iqlim dəyişmələri ilə bağlı qlobal təşəbbüslərə töhfəmiz olacaq.

“Makroiqtisadi sabitliyin qorunub saxlanılması qarşıdan gələn ildə əsas vəzifələrimizdəndir. Dövlət büdcəsinin müzakirəsi zamanı Mərkəzi Bankın rəhbərinin verdiyi məlumata görə, ölkədə aparılan pul-kredit siyasəti 2025-ci ildə də inflyasiyanın minimum həddə saxlanmasına imkan verəcək. Bu da əhalinin pul gəlirlərinin dəyərinin qorunub saxlanılmasına və rifahına müsbət təsir göstərəcək. Büdcənin icrası zamanı maliyyə sabitliyinin qorunması və şəffaflığın artırılması məqsədilə güclü nəzarət mexanizmləri tətbiq ediləcək. Dövlət büdcəsinin səmərəli və şəffaf idarə edilməsi, resursların məqsədli şəkildə istifadə olunmasına zəmanət verəcək. Azərbaycanın 2025-ci il dövlət büdcəsi ölkəmizin gələcək inkişafı üçün möhkəm bir təməl olacaq və hər birimizi birgə uğurlu nəticələrə aparacaq”, - deyə A.Badamov vurğulayıb.