Bakı, 28 sentyabr, AZƏRTAC

Burada olmaqdan məmnunam. Yeni vəzifəm üçün çox həyəcanlıyam. İlk dəfə Türkiyədən kənarda bir komandaya başçılıq edəcəyəm. Daha əvvəl ölkəmdə həm baş məşqçi, həm də köməkçi məşqçi kimi işləmişəm. Oradakı təcrübələrimi azərbaycanlı qardaşlarımızla bölüşmək, basketbolun inkişafına xidmət etmək üçün gəlmişəm.

Bu sözləri AZƏRTAC-a açıqlamasında “Gəncə” basketbol komandasının yeni baş məşqçisi Bedri Meriç təyinatını şərh edərkən deyib.

Türk mütəxəssis əvvəldən Azərbaycan Basketbol Federasiyası ilə bəzi əlaqələrinin olduğunu bildirib: “Oğlum Derin Berköz də Azərbaycanın U-16 və U-18 yığmalarında çıxış edir. U-16 C Divizionunda Avropa ikincisi olarkən ən yaxşı 5 oyunçudan biri seçilmişdi. Federasiyada məni tanıdıqları üçün belə bir təklif irəli sürdülər. Beləcə, təyinat gerçəkləşdi”.

O, Gəncə şəhərinə layiq komanda quracaqlarını vurğulayıb: “Komandanın oyunlarına baxırdım. Ötən mövsüm Azərbaycan Kubokunun finalında “Sabah”a qarşı keçirdiyi matçı da izləmişdim. Kuboku qazandılar. Amma bu mövsüm fərqli komanda qurulub. Heyətimiz daha çox yerli və gənc basketbolçulardan ibarətdir. Çoxu ilk dəfə məsuliyyət daşıyacaq, meydana çıxacaq. Ötən mövsümdəki kimi təcrübəli heyətimiz yoxdur. Üstəlik, seçdiyimiz ABŞ basketbolçularından yalnız ikisi ölkədən kənarda çıxış edib. Qalanları təcrübəsizdirlər. Bunu da özümüz bilərəkdən etdik. Çünki gənclərdən ibarət döyüşkən kollektiv formalaşdırmaq istəyirik. Gəncənin nə qədər gözəl və qədim tarixə malik şəhər olduğunu bilirəm. Bu şəhərə layiq komanda quracağıq”.

B.Meriçin sözlərinə görə, hazırda türk basketbolçu transfer etmək fikirləri yoxdur: “Bəlkə gələcəkdə ola bilər. Amma türk oyunçular da Azərbaycanda legioner sayılırlar. Bu səbəbdən 6 əcnəbi basketbolçumuzu ABŞ-dan transfer etdik. Hələlik bu cür davam edəcəyik”.

Komandanın qarşısında duran vəzifələrdən də söz açan baş məşqçi hədəflərinin pley-off mərhələsinə vəsiqə qazanmaq və bacardıqları qədər irəliləmək olduğunu söyləyib: “İnanıram ki, Azərbaycan Kubokunda da uğurlu çıxış edəcəyik. Məqsədim xüsusilə evdə keçirəcəyimiz oyunlarda uduzmamaqdır. Bütün ev matçlarında favorit biz olacağıq. Ona görə də azarkeşlərimizdən dəstək gözləyirik. Bu idmandır, uduza da bilərik. Amma fanatlarımız meydanda hər zaman mübarizə aparan komanda görəcək. Gənc və təcrübəsiz olsaq da, daim vuruşacağıq. Şüarımız da məhz “Sonadək mübarizə” olacaq”.

İlk dəfə Türkiyədən kənarda işləyəcəyini xatırladan 41 yaşlı mütəxəssis Azərbaycanı özü üçün yad ölkə hesab etmədiyini diqqətə çatdırıb: “Biz qardaş ölkələrik. Ona görə də özümü yad ölkədə hiss etmirəm. Bununla bağlı heç bir problemim yoxdur”.

Qeyd edək ki, “Gəncə” klubu Bedri Meriçlə cari mövsümün sonuna kimi müqavilə bağlayıb.