Gəncədə Anım Günü ilə əlaqədar olaraq silsilə tədbirlər keçirilib
Gəncə, 27 sentyabr, Elcan Məmmədov, AZƏRTAC
Gəncə şəhərində 27 Sentyabr - Anım Günü ilə əlaqədar olaraq silsilə tədbirlər keçirilib.
AZƏRTAC-ın bölgə müxbiri xəbər verir ki, Gəncənin Şəhidlər xiyabanında gerçəkləşən tədbirdə əvvəlcə Azərbaycanın ərazi bütövlüyü uğrunda gedən döyüşlərdə itkin düşmüş hərbçilərin adları əks olunan abidə ziyarət edilib.
Sonra “Əbədi məşəl” abidəsi önünə əklil qoyulub, hərbi orkestrin ifasında Dövlət Himni səsləndirilib.
Tədbirdə bildirilib ki, Ermənistanın Azərbaycana qarşı hərbi təcavüzünün qarşısını almaq məqsədilə Silahlı Qüvvələrimiz Ali Baş Komandanın rəhbərliyi altında 2020-ci il sentyabrın 27-də bütün cəbhəboyu əks-hücum əməliyyatına başlayıb. Vətən müharibəsində 2907 Azərbaycan hərbçisi şəhid olub, mindən çox əsgər yaralanıb, 7 nəfər itkin düşüb. Gəncə şəhəri Vətən müharibəsi dövründə 96-sı hərbi, 26-sı mülki olmaqla, 122 şəhid verib. Mərasimdə o da qeyd olunub ki, 2023-cü il sentyabr ayının 19-da üçtərəfli Bəyanatın müddəalarının təmin olunması, Qarabağ iqtisadi rayonunda törədilən genişmiqyaslı təxribatların qarşısının alınması, Ermənistan silahlı qüvvələrinin birləşmələrinin tərk-silah edilərək ərazilərimizdən çıxarılması, onların hərbi infrastrukturunun zərərsizləşdirilməsi, işğaldan azad edilmiş ərazilərə qayıdan dinc əhali, habelə bərpa-quruculuq işlərinə cəlb olunmuş mülki işçilər və hərbi qulluqçularımızın təhlükəsizliyinin təmin olunması və Azərbaycan Respublikasının konstitusiya quruluşunun bərpa edilməsi məqsədilə bölgədə lokal xarakterli antiterror tədbirlərinə başlanılıb. Silahlı Qüvvələrimiz tərəfindən Qarabağ iqtisadi bölgəsində həyata keçirilən lokal xarakterli antiterror tədbiri 23 saat 43 dəqiqə çəkib, Ermənistan silahlı qüvvələrinin birləşmələri, qeyri-qanuni erməni silahlı dəstələri silahı yerə qoymağa, döyüş mövqelərindən və hərbi postlardan çıxmağa məcbur olublar. Müzəffər Ali Baş Komandan, Prezident İlham Əliyevin rəhbərliyi ilə Azərbaycan öz suverenliyini bərpa edib.
Sonra Azərbaycanın suverenliyi uğrunda canlarından keçən şəhidlərin əziz xatirəsi bir dəqiqəlik sükutla yad olunub. Avtomobillər, yanğınsöndürən maşınlar vasitəsilə saat 12:00-da səs siqnalları verilib.
Daha sonra Vətən müharibəsi zamanı Ermənistan silahlı qüvvələrinin Gəncəni raket atəşinə tutması nəticəsində dağılan ərazi ziyarət edilib, burada həlak olan mülki insanların şəkil və məlumatlarını əks etdirən lövhəyə baxış keçirilib.
Gəncə-Daşkəsən Regional Təhsil İdarəsinin tabeliyində fəaliyyət göstərən Gəncə şəhər ümumtəhsil müəssisələrində təhsil alan şagirdlərin iştirakı ilə “Məktəbdən qələbəyə” adlı yürüş təşkil olunub.
Silsilə tədbirlərin davamı olaraq Heydər Əliyev Park-Xiyaban Kompleksinin ərazisində Vətən müharibəsində həlak olmuş şəhidlərimizin əziz xatirəsinə həsr edilən ağacəkmə aksiyası keçirilib. Gəncə Şəhər İcra Hakimiyyətinin başçısı Niyazi Bayramovun, idarə, müəssisə və təşkilat rəhbərlərinin qatıldığı aksiyada şəhərin iqlim şəraitinə uyğun olan ağaclar əkilib.
Bölmənin digər xəbərləri
