GƏNCƏDƏ ELEKTRİK ENERJİSİNİN HAQQI ÖDƏNİLMƏYİNCƏ MƏHDUDİYYƏT GÖTÜRÜLMƏYƏCƏK
AZƏRTAC-ın müxbiri xəbər verir ki, Gəncə əhalisi elektrik enerjisi haqqını ödəməsə, məhdudiyyətlər götürülməyəcək. Bunu “Bayva” Qərb Enerji Şirkətinin baş meneceri Fəxrəddin Aydayev mətbuat konfransında bildirmişdir. Şirkətdə son illər görülən yenidənqurma işlərindən danışan baş menecer demişdir ki, Gəncədə olan 58 min abunəçinin cəmi 14 faizi elektrik enerjisi haqqını ödəyir ki, bu da yay mövsümündə məhdudiyyətin götürülməsinə imkan vermir. Hazırda şirkətin öz işçilərinə 8 milyard manat əmək haqqı borcu var. Bundan başqa, qış mövsümünə də hazırlıq görülməlidir ki, bu da xeyli vəsait tələb edir.
