Gənclər “Təmiz dünya naminə” ekoloji tədbir keçirəcəklər
Bakı, 11 aprel (AZƏRTAC). Azərbaycan Tələbə Gənclər Təşkilatları İttifaqı (ATGTİ) daxilində yaradılmış müxtəlifyönlü işçi qrupların fəaliyyəti davam edir.
ATGTİ-nin mətbuat xidmətindən AZƏRTAC-a bildirmişlər ki, Ekologiya işçi qrupunun təşkilatçılığı ilə aprelin 12-də saat 17:00-da “Park Bulvar” Ticarət Mərkəzində “Təmiz dünya naminə” adlı ekoloji tədbir keçiriləcəkdir. Aksiyada100-dən çox gəncin iştirakı gözlənilir.
Tədbirin məqsədi dünya ictimaiyyətinin diqqətini ekologiya və təmiz dünya məsələlərinə yönəltmək, Azərbaycan gənclərinin bu məsələlərdən xəbərdar olduğunu, ekologiyanın qorunmasına biganə qalmadıqlarını göstərmək, ətraf mühitin qorunması, ekoloji mədəniyyətin fərqli formada aşılanmasını təmin etməkdir.
Ekologiya işçi qrupu gənclərimizin ekologiya sahəsinə maraqlarını artırmaq məqsədi ilə indiyədək “Yaşıl universitet” və “Gələcəyə yaşıl addımlarla” adlı 2 layihə icra etmiş, 10-dan çox seminar və görüş keçirmişdir. Nəticədə 250-yə yaxın tələbə Azərbaycan və dünya ekologiyasının hazırkı vəziyyəti, ekologiyanın qorunması istiqamətində atılan addımlarla yaxından tanış olmuşdur.
Bölmənin digər xəbərləri
