CƏMİYYƏT
Gilavar Foto Klubunun 30-a yaxın üzvü COP29-da iştirak edib
Bakı, 22 noyabr, AZƏRTAC
“Gilavar Foto Klubu” İctimai Birliyi BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında (COP29) iştirak edib.
İctimai birlikdən AZƏRTAC-a bildirilib ki, Yaşıl Zonada yerləşən Milli QHT Forumu pavilyonunda Azərbaycanda mina qurbanlarına həsr olunan fotosərgi təşkil edilib. Noyabrın 15-də və 20-22-də nümayiş olunan fotolarda Ermənistanın 30 ilə yaxın bir müddətdə mina çirkləndirməsinə məruz qoyduğu Azərbaycan torpaqlarında minaya düşmüş şəxslər təsvir olunur. İyirmi fotodan ibarət “Düyməni sıxan ayaqlar” adlı sərgi yerli və xarici ziyarətçilərdə dərin təəssürat yaradıb.
Eyni zamanda, ictimai birliyin müxtəlif dövlət qurumları, özəl təşkilat və mediada çalışan 26 üzvü COP29-un keçirildiyi məkanda fotoqraf kimi iştirak edib. Onlar hər gün mötəbər tədbirin işıqlandırılmasına öz töhfələrini veriblər.
Bundan əlavə, “Gilavar Foto Klubu” ictimai birliyi COP29-da qeyri-hökumət təşkilatı fəaliyyəti ilə yanaşı, media kimi də təmsil olunub. Təşkilatın 6 üzvü Gilavar Foto Klubu adı altında media akkreditasiyasından keçərək fotomüxbir kimi fəaliyyət göstərib.
