GİNNESİN REKORDLAR KİTABINA DÜŞMƏK İSTƏYİRDİ XƏSTƏXANAYA DÜŞDÜ

01.07.2004 [18:54]
Çap et
A⁺ A^-

AZƏRTAC-ın Moskvadan aldığı xəbərə görə, avstriyalı idmançı Kristina Qrubelnik iyulun 1-də Ostankino teleqülləsindən paraşütlə tullanarkən ağır yaralanmışdır. Paraşütçü qız Ginnesin Rekordlar kitabına düşmək istəyirdi, lakin xəstəxanaya düşdü.

Moskva Baş Mülki Müdafiə və Fövqəladə Hallar İdarəsi bildirmişdir ki, bu hadisə saat 13-də beys-campinq, yəni tərpənməyən obyektlərdən tullanmaq üzrə Dünya kuboku uğrunda beynəlxalq yarışlar zamanı baş vermişdir.

Qubelnik 365 metr hündürlükdəki meydançadan tullanmışdır. Lakin tullanmanı düzgün ölçüb-biçmədiyindən enərkən paraşütün ipləri 85 metr hündürlükdəki televiziya antenasına ilişmişdir. Bu zaman o, çox zərblə qülləyə çırpılmışdır.

Dərhal köməyə çağırılan xilasedicilər avstriyalını ilişib qaldığı yerdən düşürmüşlər. O, ağır vəziyyətdə xəstəxanaya aparılmışdır.