Giorgi Tatuaşvili: Heydər Əliyev dünyada çox böyük nüfuza malik tarixi şəxsiyyətdir
Tbilisi, 8 may, AZƏRTAC
Bu gün tək-tək şəxsiyyətlər var ki, onlar haqqında ürəklə danışa bilirsən. Azərbaycan xalqının ümummilli lideri, bizim də yaxın dostumuz olmuş Heydər Əliyev belə şəxsiyyətlərdən biridir.
AZƏRTAC xəbər verir ki, bu fikri jurnalistlərə açıqlamasında Gürcüstanın Dmanisi Rayonu İcra Hakimiyyətinin başçısı Giorgi Tatuaşvili söyləyib. O deyib: “Hər birimizə yaxşı məlumdur ki, Heydər Əliyev Cənubi Qafqazda çox böyük nüfuza malik tarixi şəxsiyyət olub. O dünyada tanınan, hörmətlə anılan siyasi xadim olub. Belə şəxsiyyət hər zaman hörmətə layiqdir”.
Ölkələrimiz arasında dostluğun çox qədim tarixi olduğunu deyən G.Tatuaşvili vurğulayıb ki, müasir Azərbaycan-Gürcüstan münasibətlərinin əsasında Heydər Əliyev şəxsiyyəti dayanır. Heydər Əliyev və Eduard Şevardnadzenin həyata keçirdikləri siyasət nəticəsində bizim dostluğumuz yeni mərhələdə inkişaf edib, möhkəmlənib.
Bu gün Azərbaycan xalqı Heydər Əliyevin anadan olmasının 96-cı ildönümünü qeyd edir. Gürcüstanda da Heydər Əliyevin doğum günü hər il geniş qeyd olunur. Bu da gürcü xalqının Heydər Əliyevə olan sevgi və hörmətindən irəli gəlir.
“Bu inam, sevgi və hörmət dostluğumuzu daha da möhkəmləndirir. Bu gün inamla deyə bilərik ki, bizim dostluğumuzu heç kim və heç bir şey poza bilməyəcək”, - deyə G.Tatuaşvili vurğulayıb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
