Görkəmli epidemioloq alim İsmayıl Axundovun 120 illiyi münasibətilə konfrans keçirilib
Bakı, 26 yanvar, AZƏRTAC
O, 1919-cu ildə Azərbaycan Xalq Cümhuriyyətinin qərarı ilə dövlət hesabına xaricdə təhsil alan 100 tələbədən biri olub. Sovet hakimiyyəti qurulandan sonra xaricdə təhsil alan tələbələrdən 45 nəfəri pulsuzluq ucundan geri qayıdıb. Cərrahlığa böyük həvəs göstərsə də, sonradan məşhur cərrah, akademik Mustafa Topçubaşovun təklifi ilə ixtisasını epidemiologiya üzrə davam etdirən İsmayıl təhsilini əla qiymətlərlə başa vurduğuna görə onu assistent kimi həmin universitetdə saxlayıblar. Hamburq Tropik Xəstəliklər İnstitutunda məşhur epidemioloq alim, professor Erik Martininin rəhbərliyi altında çalışıb. Həmin illərdə onu yoluxucu xəstəliklərin tüğyan etdiyi Konqo, Əlcəzair, Tunis, Nigeriya kimi Afrika ölkələrində epidemiyaya qarşı mübarizə aparmağa göndəriblər. 1927-ci ildə Bernard Nohth adına Hamburq Tropik Xəstəliklər İnstitutunda namizədlik dissertasiyası müdafiə edərək ilk azərbaycanlı epidemioloq olub.
AZƏRTAC xəbər verir ki, bu barədə Azərbaycan Tibb Universitetində tibb elmləri doktoru, professor İsmayıl Axundovun anadan olmasının 120 illiyi münasibətilə keçirilən konfransda söhbət gedib.
Tədbiri giriş sözü ilə Tibb Universitetinin elmi işlər üzrə prorektoru Rauf Bəylərov açaraq görkəmli alimin tibb elmi qarşısındakı xidmətlərindən, epidemioloji xəstəliklərlə mübarizə sahəsində gördüyü işlərdən danışıb.
Konfrans iştirakçıları professor İsmayıl Axundovun həyatından bəhs edən filmi izləyiblər.
Universitetin epidemiologiya kafedrasının müdiri, tibb elmləri doktoru, professor İbadulla Ağayev İsmayıl Axundovun elmi, pedaqoji və ictimai fəaliyyəti haqqında məruzə edib. Qeyd olunub ki, 1929-cu ildə Hamburq İnstitutundakı işini, oradakı ev-eşiyini qoyub Bakıya qayıdaraq Epidemiologiya və Mikrobiologiya İnstitutunda entomoloji şöbəyə rəhbərlik edib. Sonralar o, Bakı tropik stansiyasının direktoru, Həkimləri Təkmilləşdirmə İnstitutunda kafedra müdiri, Səhiyyə Nazirliyinin malyariya ilə mübarizə şöbəsinin rəisi vəzifələrində işləyib. Epidemiologiya və parazitologiya sahəsində ölkənin ən yaxşı mütəxəssislərindən biri olan professor İsmayıl Axundov bilik, bacarıq və təcrübəsini o vaxt az qala bütün ölkəni bürüyən malyariyaya qarşı mübarizəyə həsr edib.
Konfransda böyük alimin Tibb İnstitutunda epidemiologiya kafedrasının yaradılmasında müstəsna əməyi olduğu və ömrünün sonuna qədər həmin kafedraya rəhbərlik etdiyi də qeyd olunub, onun həyatının ayrı-ayrı məqamları xatırlanıb.
Professorlar Ədalət Tahirzadə, Əyyub Əzizov və Fəxrəddin Məmmədov çıxış edərək epidemioloq-alimin Azərbaycan tibb elmi sahəsində göstərdiyi xidmətlərdən, elmin bu sahəsində açdığı cığırdan və çoxlu davamçılar yetişdirdiyindən bəhs ediblər.
Görkəmli alimin qızı Nailə Axundova atasının xatirəsinə göstərilən hörmət və ehtirama görə təşəkkürünü bildirib.
Bölmənin digər xəbərləri
