GÖYÇAYDA 20 YANVAR ŞƏHİDLƏRİNİN XATİRƏSİNƏ HƏSR OLUNMUŞ RESPUBLİKA TURNİRİNİN QALİBLƏRİ MƏLUMDUR
Göyçay, 19 yanvar (AZƏRTAC). Gənclər və İdman Nazirliyinin təqvim planına uyğun olaraq Göyçay şəhərində 20 Yanvar şəhidlərinin xatirəsinə həsr olunmuş yunan-Roma güləşi üzrə XIII ənənəvi respublika turniri keçirilmişdir.
Göyçay Dövlət İdarəetmə və Texnologiya Kollecinin idman klubunda keçirilən yarışda respublikanın 15 şəhər və rayonunu təmsil edən 18 komandanın 210 yeniyetmə güləşçisi iştirak etmişdir.
Turnirin açılış mərasimində çıxış edənlər bildirmişlər ki, artıq 13 ildir keçirilən bu yarışın əsas məqsədi 20 Yanvar faciəsi zamanı şəhid olmuş Vətən övladlarının xatirəsini əbədiləşdirmək, yeniyetmə idmançılara vətənpərvərlik ruhu aşılamaq və onlar arasında güləş idman növünü təbliğ və inkişaf etdirməkdir.
Bu turnirdə uğurla yarışan idmançılar təmsil etdikləri rayonların yeniyetmələrdən ibarət yığma komandasının heyətinə daxil ediləcək və fevralda Bakıda keçiriləcək güləş üzrə Azərbaycan birinciliyinin mükafatları uğrunda mübarizəyə qoşulacaqlar.
Beynəlxalq və respublika dərəcəli hakimlər tərəfindən idarə olunan turnirdə 1992-94 və 1995-96-cı illər təvəllüdlü yeniyetmə güləşçilər 11 çəki dərəcəsində mükafatlar uğrunda mübarizə aparmışlar.
Yarışların yekununa əsasən, Seymur Hüseynov (26 kq, Qubadlı), Zülfüqar Əliyev (29 kq, Sumqayıt), Rəhman Allahverdiyev (32 kq, Qubadlı), Cavidan Səfiyev (35 kq, Göyçay), Mürsəl Quliyev (38 kq, Şirvan), İzzət Süleymanov (42 kq, Gəncə), Hüsən İsmayılov (46 kq, Beyləqan), İmran Həsənov (50 kq, Beyləqan), Elsəvər Əzimov (54 kq, Cəlilabad), Elçin Əliyev (58 kq, Cəlilabad) və Güləhməd Mirzəyev ( 63 kq, Şirvan) birinci yeri tutmuşlar. İlk üç yeri tutan güləşçilər rayon gənclər və idman idarəsinin diplom və medalları ilə təltif olunmuşlar.
Bölmənin digər xəbərləri
