GÜRCÜSTAN PARLAMENTİ NAZİRLƏR KABİNETİNİN YENİ TƏRKİBİNİ TƏSDİQ ETMİŞDİR

20.02.2004 [19:04]
Çap et
A⁺ A^-

AZƏRTAC-ın müxbiri Tbilisidən xəbər verir ki, Gürcüstan parlamenti növbədənkənar sessiyasında 165 səs lehinə, 5 səs əleyhinə olmaqla yeni hökumətin tərkibini təsdiq etmişdir. Nazirlər Kabineti əvvəlki hökumətin yenidən qurulması əsasında yaradılmış, 40-dək müxtəlif dövlət idarəsi 15 nazirlikdə birləşdirilmişdir. Bundan sonra hər bir nazir rəhbərlik etdiyi sahənin fəaliyyəti barədə hər iş gününün sonunda Baş nazir Zurab Jvaniyaya məlumat verəcəkdir.

Parlamentə yeni hökumətin üzvlərini Baş nazir Zurab Jvaniya təqdim etmiş və yeni komandanın gələcək beşillik proqramı əks olunan “Bütöv və güclü Gürcüstan uğrunda” adlı 24 səhifəlik məruzə ilə deputatları tanış etmişdir. Baş nazir bildirmişdir ki, yeni hökumətin üzvləri aydın dərk edirlər ki, “məxməri inqilab” törədən xalq heç vaxt hökumətin səhv addımını bağışlamayacaqdır.

Yeni nazirlər parlament üzvlərini həyata keçirəcəkləri struktur dəyişiklikləri və bütövlükdə fəaliyyət proqramları ilə tanış etmişlər.