GÜRCÜSTANDA MALYARİYAYA TUTULMUŞ 14 XƏSTƏ QEYDƏ ALINMIŞDIR

02.07.2004 [13:57]
Çap et
A⁺ A^-

AZƏRTAC-ın xüsusi müxbiri xəbər verir ki, son həftə Gürcüstanda 14 nəfərin malyariya xəstəliyinə tutulduğu qeydə alınmışdır. Onlardan 10 nəfəri Siqnaxi, 4 nəfəri Marneuli rayonlarının sakinləridir. Malyariya ilə mübarizə üzrə Dövlət Proqramının əlaqələndiricisi Merab İosavanın bildirdiyinə görə, bunun başlıca səbəbi malyariyanı yayan ağcaqanadların artmasına rəvac verən şəraitdir.

Son məlumata görə, cari ildə Gürcüstanda malyariya xəstəliyinə tutulmuş 25 nəfər qeydə alınmışdır. Onların əksəriyyəti malyariyanın əsas ocağı hesab edilən Kaxeti bölgəsindəndir. 2004-cü ilin fevralında burada bir tropik malyariya faktı da qeydə alınmışdır. Müayinə zamanı aydın olmuşdur ki, həmin adam xəstəliyə Afrikada olarkən tutulmuşdur. Mart-aprel aylarında Axalsixedə, Bakı-Tbilisi-Ceyhan neft kəmərinin çəkilişində çalışan 6 nəfər hindli də həmin xəstəliyə tutulmuşdur.

Ekspertlərin fikrincə, cari ildə Gürcüstanda malyariya xəstəliyinə tutulanların sayı ötən ildəkindən az olacaqdır.