Gürcüstanda narkotiklərlə mübarizə nəticəsində 69 nəfər saxlanılıb
Tbilisi, 23 aprel, AZƏRTAC
Gürcüstan polisi narkotik vasitələrin qanunsuz dövriyyəsinə qarşı mübarizə çərçivəsində martın 17-dən aprelin 22-dək 69 nəfəri saxlayıb.
AZƏRTAC xəbər verir ki, bu barədə Gürcüstan Daxili İşlər Nazirliyi məlumat yayıb.
Bildirilir ki, saxlanılanlar arasında Gürcüstan vətəndaşları ilə yanaşı, Azərbaycan, İran, Türkiyə, Rusiya, Rumıniya, Ukrayna, Qazaxıstan, Malayziya və Belarus vətəndaşları da olub.
Həbs olunanların əksəriyyəti narkotik satmaqda ittiham olunur.
Həbs edilənləri narkotik vasitələrin qanunsuz əldəetmə, saxlama, satma və satmağa cəhd ittihamı ilə 15 ilə qədər həbs cəzası gözləyir.
Narkotiklərlə bağlı cinayətlərə görə aktiv həbslər ölkədə narkotik siyasətinin sərtləşdirilməsinə, cinayət və inzibati cəza müddətlərinin dəyişdirilməsinə yönəlmiş səkkiz qanuna düzəlişlərin Gürcüstan parlamentinə təqdim edilməsindən sonra başlayıb.
Qəbul edilən dəyişikliklərə əsasən, narkotik vasitələrin qanunsuz dövriyyəsi mütəşəkkil cinayətkarlıq, reket və “oğru dünyası” ilə yanaşı, dövlətin xüsusi nəzarətində olan cinayətlər siyahısına daxil ediləcək. Narkotik alverçilərinin və onların qohumlarının cinayət yolu ilə əldə etdikləri əmlak isə dövlətin xeyrinə müsadirə olunacaq.
Bundan əlavə, narkotik vasitələrin qanunsuz dövriyyəsi və satışına görə cəzalar sərtləşdirilir.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
