Gürcüstanda yaşayan Qərbi azərbaycanlılar doğma ata-baba torpaqlarına qayıdacaqlarına inanırlar
Tbilisi, 1 fevral, AZƏRTAC
Gürcüstanda yaşayan Qərbi azərbaycanlılar doğma ata-baba torpaqlarına qayıdacaqlarına inanır və həmin günü səbirsizliklə gözləyirlər. Prezident İlham Əliyevin Bakıda Qərbi Azərbaycan İcmasının üzvləri ilə görüşündə söylədiyi fikirlər bizdə bu ümidi daha da artırıb.
Bu sözləri AZƏRTAC-a müsahibəsində Gürcüstanın Marneuli rayonunun Şulaver kəndində məskunlaşan Qərbi Azərbaycandan olan Əziz Məmmədov söyləyib.
Onun sözlərinə görə, bu gün Şulaver kəndində 10 minə yaxın insan yaşayır. Onların 80 faizindən çoxunu azərbaycanlılar təşkil edir. Onların da 80 faizə qədəri Qərbi azərbaycanlılardır. Şulaverdə məskunlaşan Qərbi azərbaycanlıların bəziləri İrəvandan, böyük əksəriyyəti isə Ağababa mahalından - Amasiya rayonundandırlar.
Ağababa mahalının Qızılqoç, Calaloğlu, Quzukənd, Güllücə, Kalino, Balıqıı, Çivinli, Oxçuoğlu və digər kəndlərindən olan bu insanlar indi Şulaverdə bir ailə kimi yaşayırlar.
Əziz Məmmədov deyir ki, onların arasında elə bir insan tapılmaz yenidən Qərbi Azərbaycana, öz doğma yurd - yuvalarına qayıtmaq istəməsin: “Hamımızın bir arzumuz var, o torpaqlara qayıtmaq. Prezident İlham Əliyevin söylədiyi fikirlər bizə yeni ruh və inam verdi. Biz inanırıq ki, həmin torpaqlara qayıdacağıq”.
O deyir ki, bəzi gürcülər, eləcə də Şulaverdə yaşayan bəzi ermənilər bir zamanlar onlara məxsus olan torpaqlara baş çəkiblər. Həmin adamlar, indi kəndlərimizin tamamilə boş, kimsəsiz qaldığını söyləyirlər. “Ermənilər yaxşı bilirlər ki, o torpaqlar bizə məxsusdur. Necə ki, Azərbaycan Ordusu ermənilərin 30 ilə yaxın işğal altında saxladıqları torpaqları alıb, indi azərbaycanlılar öz doğma yurd-yuvalarına qayıdırlar, eləcə də biz qayıdacağıq”, - deyə Ə.Məmmədov vurğulayıb.
Ağabab mahalının Quzukənd kəndindən olan Cümşüd Məmmədov da torpaqlarına qayıdacaqları günü səbirsizliklə gözləyir. O deyir: “Azərbaycan Prezidenti İlham Əliyevin Qərbi Azərbaycan İcmasının üzvləri ilə görüşdə səsləndirdiyi qətiyyətli fikirlər bizdə böyük inam yaradıb. Yaşlı nəslə bu qismət olmasa da, cavanlarımız buna nail olacaqlar. Şulaverdə yaşayan Qərbi azərbaycanlılar artıq bu istiqamətdə çalışmağa başlayıblar. Onlar Prezident İlham Əliyevin təklif və təşəbbüsünü yekdilliklə dəstəkləyirlər”.
Balıqlı kəndindən olan Nigar İskəndərova isə deyir: “Prezident İlham Əliyevin söylədiyi fikirlərdən sonra övladlarım, yaxın qohum-əqrəbam hər gün İrəvandan danışırlar. Gənclərə və uşaqlarımıza İrəvandan deportasiya olunmağımızın səbəblərini açıqlayırlar. Onlara bərəkətli torpaqlarımızın füsunkar gözəlliyindən danışırlar. İndi uşaqlarımızda da inam yaranıb. Onlar da Azərbaycan Prezidentinin parlaq qələbəsini dəstəkləyir və onun söylədiyi fikirlərinin gec-tez həyata keçəcəyinə inanırlar”.
Güllücə kənd sakini Zahid Ələkbərov isə yuxuda da Amasiya rayonunun dağlarını görür. Onun ailəsi də kəndlərinə dönmək arzusundadır. Hətta nəvələri belə tez-tez Güllücəyə həsr olunmuş şeir və mahnılar oxuyurlar. Onun sözlərinə görə, Güllücə sakinləri də doğma yurd-yuvalarına dönəcəyi günü görməyə tələsirlər.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
