GÜRCÜSTANDAKI RUSİYA HƏRBİ BAZALARININ ÇIXARILMASI DAVAM EDİR

20.09.2006 [11:34]
Çap et
A⁺ A^-

AZƏRTAC-ın xüsusi müxbiri xəbər verir ki, Cənubi Qafqazdakı Rusiya qoşunları qrupunun komandanı general-mayor Andrey Popov Gürcüstandan Rusiya hərbi bazalarının çıxarılmasının cari il üçün nəzərdə tutulan planına yüz faiz əməl edildiyini bildirmişdir.

Onun sözlərinə görə, sentyabrın 19-da Kvemo Kartli-Borçalı bölgəsinin Zalqa rayon mərkəzindəki dəmiryol stansiyasından Axalkalaki hərbi bazasının texnika və silah-sursatı yüklənmiş, bu il üçün nəzərdə tutulan sonuncu eşelonu Rusiyaya yola salınmışdır. Qatara üç tank, bir səhra laboratoriyası, 380 ton döyüş sursatı, ZU-23 tipli 11 zenit qurğusu yüklənmişdir.

Axalkalakidə qalan avtotexnika və əmlakın bir hissəsi gələn il aparılacaq və buradakı baza 2007-ci il oktyabrın 1-dək bağlanacaqdır.

Rusiyanın Batumidəki hərbi bazasının texnika və silah-sursatının çıxarılması 2007-ci ildə davam etdiriləcəkdir.