Gürcüstanın Azərbaycanlı Hüquqşünaslar Assosiasiyası “Xocalıya ədalət!” kampaniyasına qoşulub
Tbilisi, 25 fevral, AZƏRTAC
Dünya birliyi Xocalı faciəsinə hüquqi qiymət verməli və azərbaycanlılara qarşı törədilmiş bu qətliamın günahkarları layiqli cəzalarını almalıdırlar.
Bu sözləri AZƏRTAC-a müsahibəsində Gürcüstanın Azərbaycanlı Hüquqşünaslar Assosiasiyasının sədri Əli Bədirov deyib.
Ə.Bədirov bildirib ki, rəhbərlik etdiyi təşkilat “Xocalıya ədalət!” kampaniyasına qoşulub və Gürcüstanda yaşayan azərbaycanlıların, eləcə də dost və qardaş gürcü xalqının nümayəndələrinin də bu aksiyada fəal iştirakına çalışır.
“Məqsədimiz Heydər Əliyev Fondunun vitse-prezidenti Leyla Əliyevanın təşəbbüsü ilə keçirilən “Xocalıya ədalət!” təbliğat-təşviqat kampaniyası çərçivəsində Azərbaycan xalqının başına gətirilən müsibətlər barədə dünya ictimaiyyətini daha yaxşı məlumatlandırmaq, Xocalı və digər faciələrə hüquqi qiymət verilməsinə nail olmaqdır. Biz hüquqşünaslar bunun hüquqi aspektlərini araşdırırıq. Əlimizdə sübutlar var və düşünürəm ki, qarşıya qoyulan məqsədə çatacağıq”, - deyə Əli Bədirov vurğulayıb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
