Gürcüstanın Dəmir Yolu Məcəlləsi Aİ qanunvericiliyinə uyğunlaşdırılır
Tbilisi, 17 mart, AZƏRTAC
Bu gün Gürcüstan parlamentinin keçirilən komitə iclasında Dəmir Yolu Məcəlləsinə dəyişikliklər müzakirə olunub.
AZƏRTAC xəbər verir ki, Gürcüstan Dəmir Yolu Məcəlləsinə təklif olunan dəyişikliklər parlamentə hökumət tərəfindən qanunvericilik təşəbbüsü ilə daxil olub.
İqtisadiyyat və davamlı inkişaf nazirinin müavini Quram Quramişvili deyib ki, Avropa İttifaqının dəmir yolu qanunvericiliyinə uyğun olaraq islahatlara 2023-cü ildən başlanılıb. İslahatın birinci mərhələsi çərçivəsində nazirliyin tərkibində dəmir yolu nəqliyyatı sektorunun tənzimlənməsi üçün institusional və hüquqi bazanın yaradılması, Gürcüstanda dəmir yolu təhlükəsizliyinin təmin edilməsi, dəmir yolu nəqliyyatı sektorunda beynəlxalq və Avropa standartlarının tətbiqi məqsədi daşıyan Dəmir Yolu Nəqliyyatı Agentliyi yaradılıb.
Onun sözlərinə görə, təqdim olunan qanun layihələri dəmir yolu siyasəti islahatlarının ikinci mərhələsi çərçivəsində hazırlanıb və bununla da milli qanunvericiliyi Avropa İttifaqı qanunvericiliyi ilə müəyyən edilmiş yeni standartlara yaxınlaşdırıb. Qanun layihələrinin məqsədi dəmir yolu sərnişinlərinin hüquqlarının müdafiəsi ilə bağlı məsələləri qanunvericilik səviyyəsində tənzimləmək və bunun təmin edilməsi üçün müvafiq mexanizmlər yaratmaqdır. Dəyişikliklər, həmçinin xidmətin keyfiyyətini və dəmir yolu təhlükəsizliyinin səviyyəsini yüksəldəcək. Qanun layihəsində dəmir yolu ilə təhlükəli yüklərin daşınmasına nəzarət və monitorinq məsələsi də müəyyən edilib.
Müzakirələr zamanı bildirilib ki, təqdim olunan qanunvericilik təşəbbüsünün Gürcüstan qanunlarının Avropanın qanun və qaydalarına uyğunlaşdırılmasına töhfə verməsi vacibdir. Qanun layihələrinin dəmir yolu sisteminin təhlükəsizliyinin təmin edilməsinə və nəzarət funksiyalarının səmərəli həyata keçirilməsinə kömək edəcəyi qeyd olunub.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
