GÜRCÜSTANIN DUNUS KƏND SAKİNLƏRİNİN İÇMƏLİ SU PROBLEMİ HƏLL OLUNMUŞDUR
AZƏRTAC-ın müxbiri xəbər verir ki, əhalisinin sayına və ərazisinə görə Dunus, rayonun ən böyük kəndlərindən biridir. Kəndə verilən içməli su çoxdan kəsilmişdi. Əhalinin imkansızlığı üzündən bu problemi həll etmək mümkün deyildi. Buna görə də ağsaqqallar yardım üçün Azərbaycan Respublikasının Prezidentinə xahişlə müraciət etmişdilər.
Cavabı çox gözləmək lazım gəlməmişdir. Dövlətimizin başçısının tapşırığı ilə Şəmkir Rayon İcra Hakimiyyətinin nümayəndələri kəndə gələrək vəziyyətlə yerində tanış olmuş, görüləcək işləri müəyyənləşdirmişlər. 28 May - Respublika günü ərəfəsində Şəmkir Rayon İcra Hakimiyyəti öz vəsaiti hesabına kəndə içməli su xətti çəkmişdir.
Prezident İlham Əliyevin Dunus sakinlərinə bu qayğısı ilə əlaqədar kənddə təntənəli mərasim keçirilmişdir. Çıxış edənlər dunusluların xahişinə cavab olaraq onlara yubadılmadan yardım göstərdiyinə görə, Prezident İlham Əliyevə, Şəmkir rayon rəhbərliyinə kənd sakinləri adından dərin təşəkkür etmişlər. Şəmkir rayonunun nümayəndələri çıxışlarında qeyd etmişlər ki, Azərbaycan Prezidenti İlham Əliyevin göstərişi ilə Gürcüstandakı azərbaycanlılara hər cür yardım bundan sonra da davam etdiləcəkdir.
Bölmənin digər xəbərləri
