Hacıqabul gölünün ekoloji bərpası məqsədi ilə həyata keçiriləcək tədbirlər müəyyənləşdirilmişdir
Bakı, 24 yanvar (AZƏRTAC). Ötən ilin sonunda Ekologiya və Təbii Sərvətlər Nazirliyi (ETSN) Hacıqabul gölünün qurumasının qarşısını almaq üçün aidiyyəti təşkilatların iştirakı ilə müzakirələr aparmış və bu məqsədlə işçi qrup yaradılmışdır.
AZƏRTAC xəbər verir ki, Hacıqabul gölünün ekoloji vəziyyətinin yaxşılaşdırılması və ərazidə ekosistemin bərpası məqsədi ilə həyata keçiriləcək tədbirlərin müəyyənləşdirilməsi üçün ETSN-də işçi qrupun növbəti görüşü keçirilmişdir. Görüşdə Fövqəladə Hallar Nazirliyinin, ARDNŞ-in, “Azərsu” ASC-nin, Nəqliyyat Nazirliyinin, Dövlət Əmlak Komitəsinin, Dövlət Torpaq və Xəritəçəkmə Komitəsinin, “Meliorasiya və Su Təsərrüfatı” ASC-nin, eləcə də Hacıqabul rayon yerli icra orqanlarının və digər təşkilatların nümayəndələri iştirak etmişlər.
Müzakirələr zamanı qeyd olunmuşdur ki, Hacıqabul gölünün qurumasına səbəb son bir neçə il ərzində yay fəslində temperaturun yüksəlməsi nəticəsində buxarlanmanın artması, Cənub-Şərqi Şirvan düzənliyində, o cümlədən də gölətrafı ərazilərdə qrunt sularının səviyyəsinin 1,5-2 metrədək enməsi, gölü Kür çayı ilə birləşdirən kanalların qarşısının alınması olmuşdur. Gölün ekoloji bərpası üçün əsas təkliflər araşdırılmış və fikir mübadiləsi aparılmışdır.
Görüşdə həmçinin gölün qurumasının qarşısının alınması üçün qurumlara müvafiq tədbirlərin görülməsi, layihələrin hazırlanması üçün təkliflərin verilməsi həvalə olunmuşdur.
Bölmənin digər xəbərləri
