HAKİMLƏRİN SEÇKİ KOMİTƏSİNİN NÖVBƏTİ İCLASI KEÇİRİLMİŞDİR
Qeyd edilmişdir ki, hakimliyə namizədlər üçün müasir tədris üsullarından istifadə edilməklə 5 ay müddətində ilkin hazırlıq kursu keçirilmiş, tədris proqramı nüfuzlu beynəlxalq ekspertlərin iştirakı ilə hazırlanmış, namizədlərin hakim olmaq üçün lazımi biliyə və peşə hazırlığına yiyələnmələrinə xüsusi diqqət yetirilmiş, proqrama ən aktual, o cümlədən insan haqları, korrupsiya, məhkəmə etikası, hakimin davranışı, məhkəmədə işin səmərəli təşkili və digər məsələlərə dair mövzular daxil edilmiş, müxtəlif məhkəmələrdə 2 aydan çox staj keçmə təşkil olunmuşdur.
Kurslarda nüfuzlu xarici mütəxəssislər, təcrübəli məhkəmə hakimləri, görkəmli alimlər mühazirələr oxumuşlar.
İclasda vurğulanmışdır ki, ilkin tədris kursu müvəffəqiyyətlə başa çatmış, onun nəticələri üzrə namizədlərlə şəffaf şəraitdə, müşahidəçilərin iştirakı ilə imtahanlar və yekun müsahibənin keçirilməsi məsələləri müzakirə olunmuş və bütün təşkilati məsələlər həllini tapdığından bu prosesə başlanılması qərara alınmışdır.
Həmçinin, hakim vəzifələrinə yeni namizədlərin sənədlərinin qəbulu vəziyyəti də müzakirə edilmişdir. Aprelin 15-dən etibarən 3 aydan artıq müddətdə 600-dən çox hüquqşünas öz namizədliyini irəli sürmüş, son vaxtlar isə sənəd verənlərin sayı minimuma endiyindən sənəd qəbulunun iyulun 31-də başa çatması barədə qərar qəbul olunmuşdur.
Qeyd edilmişdir ki, 2005-ci ildə hakim vəzifəsinə seçim zamanı müsabiqədə iştirak edən hakimliyə namizədlərin böyük əksəriyyətinin kifayət qədər hazırlıq nümayiş etdirə bilmədiklərini nəzərə alaraq yenidən sənəd verən namizədlərin imtahanlarda iştirak etməzdən əvvəl hazırlaşmaları üçün müvafiq kurslar təşkil olunmuşdur. Hazırda davam edən kurslarda təcrübəli mütəxəssislərin, o cümlədən test imtahanının təşkili və sualların cavablandırılması ilə bağlı Tələbə Qəbulu üzrə Dövlət Komissiyası əməkdaşlarının çıxışları, habelə hüququn müxtəlif sahələri üzrə mühazirələr dinlənilərək namizədləri maraqlandıran suallar cavablandırılmışdır.
Eyni zamanda hakimliyə namizədlərə kömək məqsədi ilə hazırlanmış “Hakim vəzifəsinə namizədin Yaddaş Kitabçası” iclasda baxılaraq bəyənilmişdir. Kitabçaya “Vakant hakim vəzifələrinə hakim olmayan namizədlərin seçilməsi Qaydaları”nın tam mətni, test imtahanının suallarına dair məlumat, hakimliyə namizədin imtahanqabağı və imtahan zamanı vəzifələri, yazılı və şifahi imtahanların keçirilməsi prosedurları, qanunların öyrənilməsi məqsədi ilə tövsiyələr, sual nümunələri və məsləhətlər daxil edilmişdir.
Hakimliyə namizədlər yaddaş kitabçalarını Hakimlərin Seçki Komitəsindən ala bilərlər.
İclasda hakimliyə namizədlərlə test imtahanlarının beynəlxalq standartlara uyğun, tam şəffaf şəraitdə keçirilməsi üzrə digər təşkilati tədbirlər də müzakirə olunmuşdur.
Bölmənin digər xəbərləri
