Helsinkidə keçirilən konfransda Azərbaycan-Rusiya əlaqələrinin inkişafından bəhs edilib
Stokholm, 14 dekabr, AZƏRTAC
Dekabrın 14-də Finlandiyanın paytaxtı Helsinki şəhərində rus diasporunun 6-cı Ümumfinlandiya Konfransı keçirilib.
Tədbirdə diaspor təşkilatının rəhbəri olaraq Skandinaviya Azərbaycanlılarının Finlandiya üzrə Koordinasiya Şurasının əlaqələndiricisi Ülviyyə Cabbarova və şuranın üzvləri Aygül Rzayeva, Kamilə Süleymanova, Nazənin Ələkbərova, Leyli Hüseynova və İsmayıl Gülzar iştirak ediblər.
AZƏRTAC xəbər verir ki, Skandinaviya Azərbaycanlılarının Finlandiya üzrə Koordinasiya Şurasının əlaqələndiricisi Ülviyyə Cabbarova konfransda çıxış edərək Finlandiyada yaşayan azərbaycanlılar haqqında məlumat verib. O, soydaşlarımızın diaspor işində fəal olduqlarını, dövlət qurumlarında və özəl sektorda fəaliyyət göstərdiklərini bildirib. Finlandiya kimi inkişaf etmiş ölkədə soydaşlarımızın yerli cəmiyyətə inteqrasiya olunduğunu və müxtəlif dövlət strukturlarında azərbaycanlıların yüksək vəzifələrdə çalışdıqlarını bildirən Ülviyyə Cabbarova bunu təqdirəlayiq hal kimi qiymətləndirib.
Koordinasiya Şurasının əlaqələndiricisi, həmçinin çıxışında Böyük Vətən müharibəsində Qələbənin əldə olunmasında azərbaycanlıların rolundan da söz açıb. Azərbaycan xalqının faşizm üzərində tarixi Qələbəyə mühüm töhfələr verdiyini vurğulayan Ü.Cabbarova xalqımızın cəbhəyə 600 mindən çox oğul və qızını yola saldığını diqqətə çatdırıb. O, müharibə illərində göstərdiyi igidliyə görə 130-dan çox Azərbaycan vətəndaşının Sovet İttifaqı Qəhrəmanı adına layiq görüldüyünü və 170 mindən çox əsgər və zabitimizin müxtəlif orden və medallarla təltif edildiyini bildirib.
Azərbaycan-Rusiya əlaqələrinə toxunan Ülviyyə Cabbarova iki ölkə arasında diplomatik münasibətlərin yaranması və inkişafı haqqında söz açaraq ölkəmizdə rus dilinə və mədəniyyətinə yüksək diqqətin olduğunu vurğulayıb. Həmçinin son illər iki ölkə prezidentlərinin görüşləri və imzaladıqları sənədlərin əhəmiyyətini qeyd edən diaspor təşkilatının rəhbəri Azərbaycan-Rusiya münasibətlərinin yüksək səviyyədə olduğunu konfrans iştirakçılarının diqqətinə çatdırıb. Ülviyyə Cabbarova çıxışında Azərbaycanın Birinci vitse-prezidenti xanım Mehriban Əliyevanın Rusiyaya rəsmi səfərinə də toxunaraq bunun iki ölkə arasında siyası münasibətlərin, həmçinin xalqlarımızın dostluq münasibətlərinin yüksək səviyyədə olmasının bariz nümunəsi olduğunu bildirib.
Qeyd edək ki, konfransda Finlandiyada fəaliyyət göstərən diplomatik korpusun nümayəndələri, rəsmi şəxslər, bu ölkədə fəaliyyət göstərən digər ölkələrin diaspor rəhbərləri iştirak ediblər.
Bölmənin digər xəbərləri
