HƏMVƏTƏNİMİZ SƏADƏT QƏDİROVA RF DÖVLƏT DUMASININ MİLLƏTLƏRİN İŞLƏRİ ÜZRƏ EKSPERT ŞURASININ ÜZVÜ OLMUŞDUR
Moskva, 11 mart (AZƏRTAC). Həmvətənimiz, jurnalist-politoloq, İTAR-TASS-ın müxbiri Səadət Qədirova RF Federal Məclisinin Dövlət Dumasının Millətlərin İşləri üzrə Ekspert Şurasının üzvü olmuşdur.
M.V.Lomonosov adına MDU-nun xarici dillər fakültəsinin məzunu, Denverdəki Kolorado Universitetini (ABŞ) siyasi elmlər ixtisası üzrə bitirmiş S.Qədirova uzun illərdir millətlərarası münasibətlər problemləri ilə məşğul olur. O, RF Dövlət Dumasının deputatları A.Melnikovun və İrina Xakamadanın komandasında işləmişdir. Həmvətənimiz ekspert kimi müxtəlif diskussiyalarda, “dəyirmi masa”larda və mövzu ilə bağlı digər tədbirlərdə müntəzəm iştirak edir.
Azərbaycan reallıqlarının təbliğinə görə 2009-cu ildə ölkəmizin Rusiyadakı səfirliyinin fəxri diplomuna layiq görülmüşdür.
Hazırda Səadət Qədirova MDU-nun tarix fakültəsinin və Moskva Dövlət Sosial-Humanitar İnstitutunun müəllimidir.
Asya Hacızadə
AZƏRTAC-ın xüsusi müxbiri
Moskva
Bölmənin digər xəbərləri
