HEYDƏR ƏLİYEV ÖZ XALQININ TALEYİ İLƏ YAŞAMIŞ ƏSL DÖVLƏT XADİMİ İDİ
“Mən Azərbaycan Prezidenti Heydər Əliyev ilə tanış olmağımla fəxr edirəm. Düzdür, biz onunla təkcə bir dəfə görüşmüşdük. Buna baxmayaraq, o, mənə silinməz təəssürat bağışladı.
Məsələ bundadır ki, mən bir neçə il əvvəl Bakıda da Endocərrahiyyə və litotripsiya mərkəzi açmaq istəyirdim. Heydər Əliyeviç Moskvaya səfərə gəlmişdi, həmişə atalıq qayğısı göstərdiyi Müslüm Maqomayevlə və Azərbaycanın Rusiyadakı səfiri Ramiz Rizayevlə birlikdə Prezidentin iqamətgahında onun qonağı olduq. İki saat söhbət etdik. Halbuki, bu görüş üçün cəmi 15 dəqiqə ayrılmışdı. Mən olduqca maraqlı və məzmunlu bu söhbəti heç zaman unutmayacağam. Heydər Əliyeviç təbabətə dair dərin bilik nümayiş etdirməklə yanaşı, öz həyatının maraqlı məqamlarından, bu həyata necə başladığından, Moskvaya necə gəldiyindən də danışır, fəaliyyətinin ayrı-ayrı fraqmentlərini, Moskvadan necə getdiyini xatırlayırdı. Əlbəttə ki, o, tamamilə qeyri-adi, heyrətamiz bir insan idi. Mən bunu həmişə bilirdim. Bunu da bilirdim ki, o, Siyasi Büroda və onda ali hakimiyyət dairələrində işləyənlər arasında ən səriştəli və savadlı adamlardan biri idi. Onların fonunda Heydər Əliyeviçin əzəmətli siması çox kəskin şəkildə seçilirdi.
Heydər Əliyeviçlə söhbət edərkən ona heyran qalmaya bilmirdin, çünki müsahibini dərhal valeh edirdi. O, öz həyatı, fəaliyyətə necə başladığı, Bakıda vəziyyətin necə olduğu, Azərbaycanın nə kimi problemlərlə qarşılaşdığı barədə çox maraqla danışırdı. O, mənə hətta deyirdi ki, evə, Azərbaycana qayıdandan sonra özünü daha yaxşı hiss etməyə başlamışdır. Onu xalq çağırıb, xalq da Prezident seçibdir.
Mən həmişə ona salam göndərirdim, o da həmişə mənə hamımızın sevimlisi Müslüm Maqomayevin vasitəsilə, dostum, Azərbaycanın Rusiyadakı səfiri Ramiz Rizayev vasitəsilə salam göndərirdi. Ramiz Rizayev Bakıya səfərlərinin birindən sonra onun şəxsi hədiyyəsini – öz dəst-xətti ilə xatirə sözləri yazdığı fotoşəkli mənə çatdırdı. Bu şəkil mənim üçün çox əziz və qiymətli hədiyyədir.
Görüşümüzə qayıdaraq, demək istəyirəm ki, bu heyrətamiz insanla söhbətdən sonra başa düşdüm ki, öz xalqının taleyinə, bütün insanların taleyinə, nəhayət, Rusiyanın taleyinə biganə olmayan əsl dövlət xadimi ilə görüşdüm. Yeri gəlmişkən, o, heç vaxt özünü Rusiyadan ayırmırdı. Zənnimcə, o, Rusiyanı ürəkdən sevən ən nurlu insanlardan biri idi. Bir sözlə, çox fəxr edirəm ki, Heydər Əliyevi tanıyırdım, belə heyrətamiz və görkəmli insanla tanış idim, mənə onu görmək və dinləmək xoşbəxtliyi nəsib olmuşdur.
Ona da çox şadam ki, İlham Əliyev prezident seçkilərində inamlı qələbə qazanmışdır. Azərbaycanın yeni Prezidenti İlham Əliyevə böyük rəğbətim var. O, çox savadlı, ziyalı, mədəni, yüksək ixtisaslı insandır, yaxşı təhsil alıb, xarici dilləri bilir, ölkə Prezidenti olmaq üçün bütün inkişaf pillələrini keçmişdir. Əminəm ki, o, ölkəni doğru yolla aparacaqdır. Diqqətəlayiq haldır ki, Heydər Əliyevin siyasi xətti davam edir, bundan sonra da davam edəcəkdir, başlıcası isə, ictimai-siyasi sabitlik qorunub saxlanılacaqdır. Bu sabitlik, ilk növbədə, Heydər Əliyevin xidmətidir. Onun çox yüksək nüfuz və hörmətinin, dərin zəkasının, böyük zəhmətinin bəhrəsidir. Mən İlham Əliyevin dövlət başçısı seçilməsini Azərbaycan xalqının çox uğurlu seçimi sayıram və əminəm ki, o, atasının yolu ilə gedir, Azərbaycan daim inkişafda olacaq və həyat ancaq yaxşılaşacaqdır”.
Bölmənin digər xəbərləri
