Heydər Əliyev Sarayında 20 Yanvar faciəsi ilə əlaqədar anma mərasimi
Bakı, 19 yanvar, AZƏRTAC
Yanvarın 19-da Heydər Əliyev Sarayında 20 Yanvar faciəsinin iyirmi altıncı ildönümünə həsr olunmuş anma mərasimi keçirilib.
Sarayın mətbuat xidmətindən AZƏRTAC-a bildirilib ki, əvvəlcə sarayın foyesində 20 Yanvar faciəsini əks etdirən kitab və fotostendinə baxış olub.
Faciə qurbanlarının xatirəsi bir dəqiqəlik sükutla yad edilib.
Heydər Əliyev Sarayının direktoru, Əməkdar Mədəniyyət İşçisi Fərhad Babayev bildirib ki, dinc sakinlərə qarşı törədilmiş ən qəddar cinayətlər sırasında yer alan 1990-cı il yanvar hadisəsi xalqımızın yaddaşına qanlı faciə kimi daxil olsa da, bütövlükdə milli qəhrəmanlıq tariximizin şanlı səhifələrindəndir. Qeyd edilib ki, cinayətkar imperiya rəhbərliyinin Azərbaycana qarşı xəyanətkar siyasətinə dözməyən, öz azadlığına, müstəqilliyinə can atan xalqımız həm də mübarizliyini, yenilməzliyini, qəhrəmanlığını, Vətənə sədaqətini, uzun illərdən bəri arzusunda olduğu müstəqilliyə qovuşmaq və suverenlik əldə etmək istəyini nümayiş etdirib. Məhz bunun nəticəsində, xalqımız milli azadlığına qovuşub və ölkəmiz şəhidlərin qanı bahasına qazanılan müstəqilliyini əldə edib, dünya birliyində özünün layiqli yerini tutmağa nail olub.
Tədbirin sonunda 20 Yanvar faciəsini əks etdirən sənədli film nümayiş olunub.
Bölmənin digər xəbərləri
