MƏDƏNİYYƏT
Heykəltaraş soydaşımız: Ukraynada müharibəyə baxmayaraq yeni layihələr üzərində işləyirik
Kiyev, 30 yanvar, AZƏRTAC
Rusiyanın Ukraynaya qarşı başladığı müharibədən sonra yeni layihələr əsasən vətənpərvərlik mövzusunda olur. Hazırda da vətənpərvərlik mövzusunda yeni sifariş üzərində işləyirəm.
Bunu AZƏRTAC-a açıqlamasında Ukraynanın Xalq rəssamı, Xarkov şəhərinin “Fəxri vətəndaşı”, soydaşımız Katib Məmmədov deyib.
Müharibənin ilk günlərindən Xarkovu tərk etməyən K.Məmmədov bildirib ki, bütün çətinliklərə baxmayaraq işlərini davam etdirir.
“Bu gün də çalışırıq. Ukraynanın müxtəlif şəhərlərində, o cümlədən Xarkov şəhərində müəllifi olduğum əsərləri şükür ki, qoruyub saxlaya bilmişik. Ümid edirik ki, müharibə tezliklə bitər, yeni layihələrlə Xarkov sakinlərini sevindirərik”, - deyə Katib Məmmədov əlavə edib.
Soydaşımız bildirib ki, bu yaxınlarda Poltava şəhərində müəllifi olduğu filosof, şair Qriqori Skovorodanın 3 metrlik heykəlinin açılışı da olub. Bu, müharibə dönəminin ən böyük layihələrindən biridir.
K.Məmmədov, həmçinin vurğulayıb ki, yaz aylarında Kiyevdə müəllifi olduğu dahi Azərbaycan şairi və mütəfəkkiri Nizami Gəncəvinin heykəlinin açılışının olacağı gözlənilir. Onun sözlərinə görə, heykəl kompozisiyada Nizami Gəncəvinin ayrıca abidəsi və yanında müəllifi olduğu “Xəmsə”yə aid əsərlərin qəhrəmanları yer alacaq. “Xəmsə”yə aid əsərlərin qəhrəmanlarından ibarət kompozisiya dairəvi şəkildə təsvir olunacaq, yuxarıdan baxanda isə səkkizguşəli ulduz formasında görünəcək. Nizami Gəncəvinin bürüncdən olan heykəlinin hündürlüyü 2 metr, “Xəmsə”yə aid əsərlərin qəhrəmanlarından ibarət kompozisiyanın hündürlüyü isə 3-3,5 metr olacaq.
Xatırladaq ki, Azərbaycanın dahi şairi və mütəfəkkiri Nizami Gəncəvinin abidəsinin ucaldılması ilə bağlı ölkəmizin Ukraynadakı səfirliyi ilə Taras Şevçenko adına Kiyev Milli Universiteti arasında qarşılıqlı Anlaşma Memorandumu imzalanıb. Heykəl Taras Şevçenko adına Kiyev Milli Universitetinin Nəbatat Bağında ucaldılacaq.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
