HÜQUQ TƏDRİS MƏRKƏZİNDƏ BƏLƏDİYYƏLƏRİN VƏZİFƏLƏRİ MÖVZUSUNDA SEMİNAR KEÇİRİLMİŞDİR
Seminarı giriş sözü ilə Hüquq Tədris Mərkəzinin direktor müavini İlham Abbasov açmışdır.
Tədbirdə Milli Məclisin regional məsələlər daimi komissiyasının üzvü Şaitdin Əliyev “Azərbaycan Respublikası regionlarının sosial-iqtisadi inkişafı Dövlət Proqramı” Heydər Əliyev sosial-iqtisadi islahatlarının davamıdır”, İqtisadi İnkişaf Nazirliyi Regionların sosial inkişafı Dövlət Proqramı katibliyinin məsləhətçisi Amil Əlili “Azərbaycan Respublikası regionlarının sosial-iqtisadi inkişafı Dövlət Proqramı” üzrə həyata keçiriləcək tədbirlərin əlaqələndirilməsi” mövzularında məruzələrlə, eləcə də Ədliyyə Nazirliyi nəzdində bələdiyyələrlə iş və bələdiyyələrə metodoloji yardım mərkəzinin rəisi Mehdi Səlimzadə və başqaları çıxış etmişlər.
Natiqlər bildirmişlər ki, 1995-ci ildən başlayaraq, ümummilli liderimiz Heydər Əliyevin rəhbərliyi ilə respublikamızda aparılan islahatlar nəticəsində iqtisadiyyatın inkişafında böyük uğurlar əldə edilmiş, bir çox sahələrdə, xüsusilə də makroiqtisadi göstəricilərin artımında yüksək nəticələrə nail olunmuşdur. Əsası ulu öndərimiz Heydər Əliyev tərəfindən qoyularaq, ölkədə iqtisadi potensialın formalaşmasında həlledici rol oynayan sahibkarlığın da inkişafına təkan verən iqtisadi islahatlar Prezident İlham Əliyev tərəfindən uğurla davam etdirilir. Prezident İlham Əliyevin imzaladığı “Azərbaycan Respublikasında sosial-iqtisadi inkişafın sürətləndirilməsi tədbirləri haqqında” 24 noyabr 2003-cü il tarixli Fərman və onun əsasında hazırlanmış və dövlətimizin başçısının 11 fevral 2004-cü il tarixli Fərmanı ilə təsdiq edilmiş “Azərbaycan Respublikası regionlarının sosial-iqtisadi inkişafı Dövlət Proqramı” bu uğurun bariz nümunəsidir.
Dövlət Proqramının əsas məqsədinin, Azərbaycanın regionlarında mövcud potensialdan səmərəli istifadə etməklə, iqtisadiyyatın dinamik inkişafını, müəssisələrin daha da genişləndirilməsini, ixracyönümlü məhsul istehsalının stimullaşdırılmasını, yerli sahibkarlığın tərəqqisi yolu ilə əhalinin həyat səviyyəsinin, xüsusilə gənclərin faydalı əməklə məşğulluğunun artırılmasını təmin etməkdən ibarət olduğu seminarda xüsusi vurğulanmışdır.
Tədbirdə, həmçinin qeyd edilmişdir ki, Dövlət Proqramında Bakı iqtisadi rayonu istisna olmaqla, Azərbaycan Respublikasının ərazisi 10 iqtisadi rayona bölünmüş və proqramda hər bir iqtisadi rayonun inkişafı üçün konkret tədbirlər nəzərdə tutulmuş, bütün idarəetmə strukturları, o cümlədən bələdiyyələr qarşısında bu tədbirlərin həyata keçirilməsi üzrə konkret vəzifələr qoyulmuşdur. Eyni zamanda bildirilmişdir ki, bələdiyyələr bu vəzifələri digər qurumlarla əlaqəli şəkildə həyata keçirməli, bələdiyyələr haqqında qanunvericiliyə müvafiq olaraq yerli problemləri öz büdcələri hesabına həll etməli, bu vəzifələri əsasən yerli xammal və insan resursları hesabına həyata keçirməlidirlər. Lakin zərurət yaranarsa onlar dövlət büdcəsindən ayrılan məqsədli vəsaitdən istifadə edə bilərlər.
Seminar iştirakçıları tərəfindən “Azərbaycan Respublikası regionlarının sosial-iqtisadi inkişafı Dövlət Proqramı” respublikanın regionları arasında qeyri-bərabər inkişafı aradan qaldırılmaqla, bütövlükdə ölkə iqtisadiyyatının daha da inkişafına, əhalinin iş yerləri ilə təmin edilməsinə, son nəticədə onların maddi rifah halının yaxşılaşdırılmasına təkan verən mükəmməl bir sənəd kimi qiymətləndirilmişdir.
Bölmənin digər xəbərləri
