İƏT-in gənc liderlər toplantısında Azərbaycana dəstək nümayiş etdirilib
Bakı, 14 aprel, AZƏRTAC
İstanbulda İslam Əməkdaşlıq Təşkilatı Gənclər Forumunun (İƏT GF) gənc liderlər toplantısının bağlanış mərasimində Azərbaycana dəstək nümayiş etdirilib.
Toplantıda İƏT-ə üzv olan ölkələrin aparıcı müsəlman azlıqlarını təmsil edən 200-ə yaxın gənc liderlə yanaşı, 8 ölkənin gənclər və idman nazirləri, 6 beynəlxalq təşkilatın rəhbərləri və dünyanın bir sıra aparıcı elm və ictimai xadimləri, ekspertlər iştirak ediblər. İki gün davam edən panel və işçi qrup müzakirələri zamanı Gənclik Zirvəsi tərəfindən yaxın illərdə İƏT-in gənclik siyasətinin əsas parametrlərini özündə əks etdirən Gənclik Strategiyası qəbul edilib.
Həmin prinsip və parametrlər Gənclik Zirvəsinin “10 ildə 10 hədəf - Bəyannaməsi və Təklifləri” adlı yekun sənəd şəklində formalaşdırılaraq İƏT-in Sammitinə təqdim olunacaq. Sənədə münasibət bildirildikdən sonra bu təkliflər cari ilin sonunadək qəbul ediləcək İƏT gənclik siyasəti strategiyasının əsas prinsiplərini təşkil edəcək.
Bağlanış mərasimində çıxış edən ISESCO-nun baş direktoru Əbdüləziz bin Osman əl-Tuveycri ilk dəfə olaraq keçirilən İƏT Gənclik Zirvəsinin əhəmiyyətini yüksək qiymətləndirib. O, tədbirin yekun sənədində gənclərin inkişafı, təhsili və gənclər arasında işsizliyin aradan qaldırılması kimi mühüm problemlərin konkret və yaradıcı həlli təkliflərinin yer aldığını qeyd edərək Zirvə iştirakçılarını təbrik edib. Baş direktor yekun Bəyannamədə İƏT gənclik siyasətində Türkiyə və Azərbaycanın xüsusi rollarını qeyd edib. Bildirib ki, bu ölkələr İƏT-ə digər üzv dövlətlərə örnək olacaq. Əbdüləziz bin Osman əl-Tuveycri Gənclik Zirvəsinin yekun sənədində Türkiyə Prezidenti Rəcəb Tayyib Ərdoğanın və Azərbaycan Prezidenti İlham Əliyevin gənclərin inkişafı sahəsində təşəbbüslərinin və rollarının qeyd olunmasını da yüksək qiymətləndirib.
BMT-nin Sivilizasiyalar Alyansı üzrə ali nümayəndəsi Nasir Əbdüləziz əl-Naser qəbul edilmiş yekun sənədin beynəlxalq səviyyədə mədəniyyətlərarası dialoqun inkişafında və islamofobiya ilə mübarizədə İƏT gənclərinin səfərbər olunması üçün önəmli platforma rolunu oynayacağını qeyd edib.
Tədbir zamanı İƏT-ə üzv ölkələri və beynəlxalq təşkilatları təmsil edən 200-dən artıq gənc lider tərəfindən Azərbaycanın öz ərazi bütövlüyünü bərpa etməklə bağlı atdığı addımlara və haqq mövqeyinə xüsusi dəstək nümayiş etdirilib. Müzakirələr zamanı Azərbaycanın son günlərdə öz ərazi bütövlüyünün müdafiəsi üçün işğalçı Ermənistan ordusunun təxribatlarına qarşı tutarlı cavab əməliyyatları dəstəklənib. Eyni zamanda, sosial mediada Azərbaycana dəstəklə bağlı kampaniya təsis edilməsi, bununla bərabər artıq dünyada geniş yayılmış “Xocalıya ədalət!” kampaniyasına da dəstək verilməsi təşəbbüsü irəli sürülərək qəbul olunub. Bu məqsədlə Zirvə toplantısının 200-dən artıq gənc iştirakçısı əllərində Azərbaycan bayrağı ilə çəkdirdikləri şəkillərlə #SupportAzerbaijan həştəqli sosial şəbəkə kampaniyasına start verib.
Bölmənin digər xəbərləri
