İLHAM ƏLİYEV MOSKVADA MİLLİ OLİMPİYA KOMİTƏLƏRİ RƏHBƏRLƏRİNİN İCLASINDA İŞTİRAK ETMİŞDİR
Azərbaycan Milli Olimpiya Komitəsinin Prezidenti, ARDNŞ-ın birinci vitse-prezidenti, Milli Məclisin deputatı İlham Əliyev Moskvanın meri Yuri Lujkovun dəvəti ilə MDB ölkələrinin və Baltikyanı ölkələrin milli olimpiya komitələri və Yeniyetmələrin beynəlxalq idman oyunlarının iştirakçısı olan ölkələrin idmanın idarə edilməsi üzrə dövlət orqanları rəhbərlərinin martın 21-də keçirilmiş birinci ümumi iclasında iştirak etmişdir.
Bu iclas iyunun 14-dən 24-dək Moskvada keçiriləcək belə geniş miqyaslı idman tədbirinə hazırlığın mühüm mərhələsidir. Xatırladaq ki, MDB ölkələrinin və Baltikyanı ölkələrin hamısı, o cümlədən də Azərbaycan həmin yarışlarda iştirak etmək arzusunda olduqlarını bildirmişlər.
Azərbaycan MOK-un prezidenti İlham Əliyev AZƏRTAC-ın müxbirinə demişdir ki, ölkəmiz bu oyunların keçirilməsinə böyük əhəmiyyət verir və həmin yarışlarda iştirak etmək istədiyini bildirmişdir. Azərbaycanın 114 idmançısı 12 növ üzrə yarışlarda iştirak edəcəkdir. İlham Əliyev bildirmişdir ki, Azərbaycan idmançıları 1998-ci ildə Rusiya paytaxtında keçirilmiş Yeniyetmələrin Ümumdünya Oyunlarında iştirak etmiş və qızıl, gümüş və bürünc medallar qazanaraq,139 ölkə arasında 27-ci yeri tutmuşlar. MOK-un prezidenti demişdir: “Biz Azərbaycanda uşaq və gənclər idmanına böyük diqqət yetiririk, bu isə, öz növbəsində, yaşlı idmançılarımızın gələcəkdə mötəbər beynəlxalq yarışlarda yüksək nəticələr əldə etməsi üçün yaxşı zəmin yaradır. Bakıda müntəzəm olaraq, yüksək səviyyəli beynəlxalq yarışlar təşkil edilir. Məsələn, yeniyetmələr arasında boks üzrə dünya və Avropa çempionatları keçirilmişdir. Xatırlatmaq istərdim ki, Sidney Olimpiadasında Azərbaycan idmançıları 2 qızıl və 1 bürünc medal qazanaraq, 200 komanda arasında 34-cü yeri tutdular. Yeniyetmələr arasında yarışların müsbət nəticələr verdiyini və idmanın inkişafına böyük fayda gətirdiyini nəzərə alaraq, mən Moskvanın meri Y.Lujkovun dəvətini qəbul etdim və həmin yarışlar ərəfəsində nə kimi işlər görülməli olduğu barədə dəqiq təsəvvür əldə etmək üçün bu iclasda şəxsən iştirak etmək qərarına gəldim”. Azərbaycan MOK-un prezidenti bunu da bəyan etmişdir ki, Bakı gələn dəfə Yeniyetmələrin beynəlxalq idman oyunlarının paytaxtı ola bilər. Onun fikrincə, belə bir qərar qəbul edilərsə, Azərbaycan bu tədbirin yüksək səviyyədə keçirilməsi üçün lazımi şərait yaratmağa zəmanət verir. İlham Əliyev vurğulamışdır ki, son 2-3 ildə respublikada beynəlxalq standartlara cavab verən çoxlu müasir idman obyektləri tikilmişdir. Bakıda iki olimpiya idman kompleksi inşa edilmiş və Azərbaycanın digər şəhərlərində də belə obyektlər tikilir. Hazırda 8 min adam tutan idman-konsert kompleksində yenidənqurma işləri aparılır. Bu işlər may ayında - Bakıda sərbəst güləş üzrə Avropa çempionatınadək başa çatdırılmalıdır. İlham Əliyev axırda demişdir: “Bir sözlə, Azərbaycanda beynəlxalq yarışlar keçirmək üçün hər cür şərait və müvafiq təcrübə var və biz gələcəkdə də belə yarışların yüksək səviyyədə təşkilinə zəmanət verə bilərik”.
Asya Hacızadə
AZƏRTAC-ın xüsusi müxbiri
Moskva
Bölmənin digər xəbərləri
