İMİŞLİ RAYONUNDA ARAZ ÇAYINDA YENİ QOLUN AÇILMASI İLƏ BAĞLI MÜŞAVİRƏ KEÇİRİLMİŞDİR
İmişli, 28 may (AZƏRTAC). Mayın 28-də İmişli rayonunda Araz çayında yeni qolun açılması ilə bağlı müşavirə keçirilmişdir.
Müşavirədə Baş nazirin müavini Abid Şərifov, fövqəladə hallar naziri Kəmaləddin Heydərov, daxili işlər naziri Ramil Usubov, nəqliyyat nazirinin müavini Musa Pənahov, “Azəryolservis” ASC-in sədri Cavid Qurbanov, Dövlət Torpaq və Xəritəçəkmə Komitəsinin sədri Qərib Məmmədov, “Azərenerji” ASC-in prezidenti Etibar Pirverdiyev, Meliorasiya və Su Təsərüffatı ASC-in sədri Əhməd Əhmədzadə və 12 rayonun icra başçısı iştirak etmişdir.
Müşavirədə əsas müzakirə mövzusu Araz çayının yeni qolunun açılması ilə bağlı məsələ və bu istiqamətdə görülən işlər olmuşdur.
İclasdan sonra jurnalistlərə müsahibə verən fövqəladə hallar naziri Kəmaləddin Heydərov bildirmişdir ki, indi Araz və Kür çaylarında suyun həddi qismən də olsa aşağı düşmüşdür. Amma bu bizi arxayın salmır. Ona görə biz yerlərdə bəndbərkitmə işlərini davam etdiririk. Çünki indi elə aylardır ki, dağlarda qarların əriməsi, ümumiyyətlə dəyişən iqlimin nəticəsində hər iki çayda təbii olaraq suyun artımı bizi bəndbərkitmə işlərini daha da möhkəmləndirməyə istiqamətləndirir.
K.Heydərov demişdir ki, bu günlərdə tam hazırlıq işləri görüləndən sonra Arazın bir hissəsinin açılışı olacaqdır. Həmin hissəyə buraxılan su nəzarətdə olacaqdır. O ərazidə su altında qala biləcək heç bir kənd və texniki qurğu yoxdur. Lakin, su həmin əraziyə çatanda oradakı avtomobil və dəmir yollarının necə idarə olunması haqqında artıq qərarlar verilmişdir və icraya başlanılmışdır.
Bölmənin digər xəbərləri
