İndoneziyanın ən böyük məişət tullantıları poliqonunda uçqun insan tələfatına səbəb olub
Bakı, 10 mart, AZƏRTAC
Cakartanın şərqində Bekasi şəhərindəki İndoneziyanın ən böyük məişət tullantıları poliqonu olan Bantarqebanqda tullantıların uçqunu baş verib, nəticədə azı yeddi nəfər həlak olub.
AZƏRTAC “Reuters” agentliyinə istinadla xəbər verir ki, hakimiyyət orqanlarının məlumatına görə, hadisə güclü yağışlardan sonra baş verib. Yağışlar böyük həcmdə tullantının sürüşməsinə səbəb olub. Tullantı axını poliqonun yaxınlığında olan insanların üzərinə tökülüb. Həlak olanlar arasında zibildaşıyan maşınların sürücüləri, təkrar emal üçün tullantı toplayanlar və yaxınlıqda işləyən işçilər var. Bir neçə nəfəri xilas etmək mümkün olub.
Axtarış-xilasetmə əməliyyatına yüzlərlə fövqəladə xidmət əməkdaşı cəlb edilib, ağır texnikadan, o cümlədən ekskavatorlardan istifadə olunub. İşlər bir neçə saat davam edib və bütün itkin düşənlər tapılandan sonra başa çatıb.
Sahəsi təxminən 110 hektar olan Bantarqebanq poliqonu hər gün Cakartadan və ətraf şəhərlərdən 6,5–7 min ton məişət tullantısı qəbul edir. Ekoloqlar uzun müddətdir poliqonun həddindən artıq yükləndiyi və belə hadisələrin baş verməsi riskinin artdığı barədə xəbərdarlıq edirlər.
Uçqun Cənub-Şərqi Asiyanın ən böyük şəhərlərində tullantılarla bağlı problemlərə diqqəti yenidən cəlb edib. Əhalinin və istehlakın sürətlə artması zibilin həcmini artırır, lakin emal və utilizasiya infrastrukturu bu artıma hər zaman uyğunlaşa bilmir.
Bundan əvvəl İndoneziya hakimiyyəti tullantıların idarə olunması sisteminin modernləşdirilməsi planlarını açıqlamışdı. Bu planlara zibilin emalı və tullantılardan enerji istehsalı üzrə layihələr daxildir. Ekspertlərin fikrincə, bu addımlar poliqonlara düşən yükü azalda və ekoloji riskləri aşağı sala bilər.
Bölmənin digər xəbərləri
