İnklüziv Karyera Forumu keçirilib VİDEO
Bakı, 19 fevral, Göyçək Mahmudlu, Şövqi Əzizov, Azər İbrahimov, AZƏRTAC
Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi tərəfindən əlilliyi olan şəxslərin inklüziv məşğulluğa çıxış imkanlarını genişləndirmək və karyera inkişafını dəstəkləmək məqsədilə icra edilən “İnklüziv İnkişaf Platforması” layihəsinin yekunu olaraq İnklüziv Karyera Forumu təşkil edilib.
AZƏRTAC xəbər verir ki, əvvəlcə Dövlət Himni səsləndirilib, sonra “İnklüziv İnkişaf Platforması” layihəsinin hesabat videosu nümayiş etdirilib.
Tədbirdə çıxış edən DOST İnklüziv İnkişaf və Yaradıcılıq Mərkəzinin direktoru Elnarə Ənsari həssas qrupların yaradıcı potensialı və bacarıqlarının inkişaf etdirilməsi məqsədilə həyata keçirilən layihələr barədə məlumat verib. O, Birinci vitse-prezident Mehriban Əliyevanın təşəbbüsü ilə yaradılan DOST İnklüziv İnkişaf və Yaradıcılıq Mərkəzində müxtəlif fəaliyyət istiqamətləri üzrə təlimlərə cəlb olunmuş əlilliyi olan şəxslərin və digər həssas qrupların məşğulluq imkanlarının genişləndirilməsi üçün də görülən dəstək tədbirlərini diqqətə çatdırıb.
Dövlət Məşğulluq Agentliyinin İdarə Heyətinin sədri Hasil Abbasov əlilliyi olan şəxslər üçün məşğulluq və özünüməşğulluq imkanlarının yaradılması, onların əmək bazarına çıxışlarının dəstəklənməsi üçün agentlik tərəfindən görülən işlər barədə məlumat verib. Aktiv məşğulluq proqramlarının icrasında əlilliyi olan şəxslərə üstünlük verildiyini, bu Forumun da əlilliyi olan şəxslər üçün karyera imkanlarının genişləndirilməsinin təşviqi baxımından önəmini qeyd edib.
Əmək və Əhalinin Sosial Müdafiəsi Nazirliyi yanında İctimai şuranın sədri Elşad Məmmədov isə çıxışında inklüziv məşğulluğun təşviqində ictimai nəzarətin və vətəndaş cəmiyyəti institutlarının rolunun əhəmiyyətini vurğulayıb. O, əlilliyi olan şəxslərin əmək bazarında bərabər iştirakının təmin edilməsinin yalnız dövlət siyasəti ilə deyil, həm də cəmiyyətin ümumi yanaşması və işəgötürənlərin sosial məsuliyyəti ilə mümkün olduğunu bildirib.
Forum çərçivəsində “Peşəkar bərabərlik prinsipləri əsasında inklüziv məşğulluğun genişləndirilməsi” mövzusunda keçirilmiş panel müzakirəsində inklüziv məşğulluq, əlçatan karyera imkanları, əmək bazarında bərabər iştirak, xüsusi qayğıya ehtiyacı olan şəxslərin peşə hazırlığı və sosial innovasiyalar kimi mövzular müzakirə edilib. Mərkəzin benefisiarları tərəfindən konsert proqramı da təqdim olunub. Təşkil edilən interaktiv sessiyada əlilliyi olan şəxslər öz uğur hekayələrini bölüşüblər.
Tədbir zamanı, həmçinin layihə iştirakçıları mükafatlandırılıb və sertifikatlar təqdim edilib.
Layihənin əlilliyi olan şəxslərin bilik və bacarıqlarının, şəxsi keyfiyyətlərinin inkişaf etdirilməsində müstəsna rolu olub
Dövlət Məşğulluq Agentliyinin əməkdaşı, “İnklüziv İnkişaf Platforması” layihəsinin rəhbəri Zeynəb Sabirli 2025-ci il dekabrın 13-dən etibarən layihədə iştirak edən əlilliyi olan şəxslər üçün silsilə təlimlər təşkil olunduğunu qeyd edib: “Həmin şəxslərlə 9 təlim olmaqla şəbəkələşmə görüşlərinin daxil olduğu bir prosesi başlatdıq. Təlimlər çərçivəsində iştirakçılara müasir iş dünyasının tələblərinə uyğun praktiki bilik və bacarıqlar təqdim edilib, iki dəfə şəbəkələşmə görüşü təşkil olunub. Layihəyə 30 nəfər əlilliyi olan şəxs cəlb edilib. Nəticə etibarilə bu gün layihənin yekun mərhələsi olan İnklüziv Karyera Forumu keçirildi”.
DOST İnklüziv İnkişaf və Yaradıcılıq Mərkəzinin benefisiarı Mətin Hacıyev ötən il dekabrın 14-də layihəyə qatılıdığını diqqətə çatdırıb: “İnsanların mənimlə qurduğu empatiya, göstərdikləri dəstək sayəsində onları çox sevməyə başladım. Çox sevindim ki, bizim üçün bu cür şərait yaradılıb. Əlilliyi olan şəxsləri digər insanlardan ayırmaq, fərqləndirmək olmaz. Çünki fikrimcə, insanlar bir dünyada yaşayırlarsa, eyni hüquqlardan yararlanmalı və eyni cür davranış sərgilənməlidir. Bunun sayəsində qarşıdakı insanlarla empatiya qura, onların nə hiss etdiklərini duya bilər və nəticədə onlara sevgi göstərər. Aldığım məlumatları gələcək hədəflərim üçün daha dərindən mənimsəməyə çalışdım. İnsanlar həyatda biliklə hər şeyə nail ola bilirlər. Hər nailiyyət qazandıqda çox sevinir və insanları daha çox sevirəm”.
Benefisiar Anar İbrahimov layihə çərçivəsində keçirilən təlimlərdən razılığını ifadə edib. O deyib: “Təlimlərin əsas xüsusiyyəti ondan ibarətdir ki, təlimçilər nəzəri biliklərdən çox praktik xüsusiyyətlərə üstünlük verirdilər. Mövzular əsasən şəbəkələşmə, aktiv iş imkanlarında öyrənilən biliklərin necə istifadə olunması, effektiv ünsiyyət modellərindən ibarət idi. Bu cür təlimlərin keçirilməsinə görə təşkilatçılara dərin minnətdarlığımı bildirirəm. İştirakçılar olduqca maraqlı insanlar idi, onları tanıdığım üçün şadam və hazırda təlimdə öyrəndiklərimi aktiv iş fəaliyyətimdə istifadə edirəm”.
Layihədə ilk gündən sonadək iştirak etməkdən məmnunluğunu ifadə edən Ramin Vahidovun sözlərinə görə, layihənin şəxsi keyfiyyətlərinin təzahüründə və inkişafında, bilik və bacarıqlarını daha potensiallı şəkildə göstərməkdə və bunu cəmiyyətdə inteqrasiya formasında püxtələşdirməkdə müstəsna rolu olub: “Layihə iş və potensial həyatımızda mühüm rol oynayacaq. Ümid edirəm ki, belə layihələr çox olacaq. Çünki bu tip layihələrin bəhrələri cəmiyyətdə bizim kimi insanların rolunu dəyərli edəcək”.
Bölmənin digər xəbərləri
