“İQTİSADİYYATDA ŞƏFFAFLIQ ƏSAS MEYAR OLMALIDIR”
AZƏRTAC-ın müxbiri xəbər verir ki, iclasda “Xəzər bölgəsinin regional inkişafı - beynəlxalq ictimai təşkilatların rolu, strateji məqsədləri, bölgə və yerli iqtisadiyyata təsiri” mövzusu ətrafında məruzələr dinlənilmişdir.
Giriş sözü söyləyən S.Şərifov 1993-cü ilə qədər Azərbaycan iqtisadiyyatının dağılmaq həddinə çatdığını və həmin ilin ikinci yarısından ümummilli liderimiz Heydər Əliyevin gərgin əməyi nəticəsində yenidən dirçəldiyini qeyd etmişdir. O demişdir ki, məhz ulu öndərimizin uzaqgörənliyi ilə 1994-cü ildə təməli qoyulan neft strategiyasının bu gün bəhrəsini görürük. Azərbaycan artıq dünya ölkələri sırasında özünəməxsus yeri olan bir dövlətə, regionda aparıcı nüfuza malik bir ölkəyə, onun paytaxtı Bakı isə neft-qaz sənayesi mərkəzinə çevrilmişdir.
Xalqın rifahını yüksəltmək və yoxsulluğu aradan qaldırmaq üçün respublikada faydalı tədbirlər görüldüyünü, bu məqsədlə də Neft Fondunun yaradıldığını və onun gəlirlərinin idarə edilməsində maksimum şəffaflığa nail olmağa əməli səy göstərildiyini bildirən S.Sərifov Azərbaycanın beynəlxalq şəffaflıq təşəbbüsünə qoşulduğunu, Prezident İlham Əliyevin göstərişi ilə xüsusi komissiya yaradıldığını, artıq neft gəlirlərindən necə və hansı məqsədlə istifadə edildiyi barədə məlumatların vaxtaşırı ictimaiyyətə çatdırıldığını, eyni zamanda, iqtisadiyyatın digər sahələrində də bu prinsipin əsas meyar kimi tədricən tətbiq olunacağını vurğulamışdır.
“Neft və qaz layihələrinin şəffaflığı və ardıcıllığı” mövzusunda çıxış edən Avropa Yenidənqurma və İnkişaf Bankının (AYİB) təbii resurslar üzrə baş bankiri xanım Şarlott Filipps konfransın məhz şəffaflıq devizi altında keçirilməsindən məmnun olduğunu bildirmiş və qeyd etmişdir ki, 1991-ci ildə yaranan AYİB artıq dünyada Bakı-Tbilisi-Ceyhan ixrac neft kəməri kimi irimiqyaslı layihələri maliyyələşdirən bir quruma çevrilmişdir. Biz imkanlarımız daxilində inkişaf yönümlü layihələri maliyyələşdirmək missiyasını yerinə yetirməkdə maraqlıyıq, həm də elə layihələr ki, onların bəhrəsini gələcək nəsillər görəcək, yəni davamlı, uzunmüddətli inkişafa xidmət edəcəkdir. Belə layihələr həm hökumət, həm qeyri-hökumət, eləcə də əhali tərəfindən dəstəkləndiyi üçün borc vermək və onu qaytarmaq məsələsində heç bir problem yarana bilməz. Ən vacib şərtlərdən biri isə, qeyd olunduğu kimi, şəffaflıq məsələsidir, çünki şəffaflıq olan yerdə korrupsiyaya yer qalmır. Xanım Filipps iqtisadiyyatın müxtəlif sahələrinə sərmayə yatırmaq, kredit vermək üçün Azərbaycanda çox minbit bir şəraitin yarandığını bildirmişdir.
“Hasilat sənayesi gəlirlərinin cəmiyyətin sosial inkişafı üçün istifadəsinin təmin edilməsində Dünya Bankının rolu” mövzusunda çıxış edən Dünya Bankının Cənubi Qafqaz, Avropa və Mərkəzi Asiya üzrə idarəsinin aparıcı iqtisadçısı Kristian Petersen yoxsulluğun aradan qaldırılması üçün kapital bazarındakı resursları, eləcə də donor resurslarını yoxsul ölkələrə yönəltməkdə mühüm rol oynayan Dünya Bankı barədə məlumat verməklə yanaşı, MDB ölkələrində vəziyyətə də toxunmuş və demişdir ki, bu regionda yüksək ixtisaslı əmək resursları olduğu kimi, neft və qazla zəngin olan Azərbaycan və Qazaxıstan kimi ölkələr də vardır, yəni kapital və əmək resursları yetərincədir. “2003-2005-ci illər üçün Azərbaycan Respublikasında yoxsulluğun azaldılması və iqtisadi inkişaf üzrə Dövlət Proqramı”nı və “Azərbaycan Respublikası regionlarının sosial-iqtisadi inkişafı Dövlət Proqramı”nı çox əhəmiyyətli sənədlər kimi dəyərləndirmişdir. Bankın nümayəndəsi əhalinin rifahının yaxşılaşdırılması üçün neft sektoru ilə yanaşı, qeyri-neft sektorunun da inkişaf etdirilməsinin zəruriliyini vurğulamışdır.
İclasda, həmçinin energetika sahəsində beynəlxalq əməkdaşlıq, qaz yanmasının azaldılması üzrə qlobal standartlar, Qara dəniz İqtisadi Əməkdaşlıq Təşkilatının perspektivləri, ölkənin neft sənayesində fəaliyyət göstərən bir sıra xarici şirkətlər və birgə müəssisələrin gördüyü işlər, kəşfiyyat-qazma və yeni texnologiyalar, idxal və ixrac əməliyyatları, keyfiyyətli məhsul istehsalı və s. məsələlərə toxunulmuş, mövzular ətrafında müzakirələr aparılmışdır.
Bununla da “Xəzər neft və qaz-2004” Beynəlxalq sərgi-konfransının yekun iclası öz işini başa çatdırmışdır.
Bölmənin digər xəbərləri
