İranın apardığı siyasət onu məhvə sürükləyir
Zaqatala, 7 aprel, Mustafa Dadaşov, AZƏRTAC
Əslində, İranın bizə qarşı xoş niyyətli olmadığını çoxdan bilirik. Dövlətimiz də bilir, xalqımız da. Bizi susmağa və İranın hərəkətlərinə göz yummağa vadar edən bir neçə səbəb var ki, bunun da ən başlıcası orada 40 milyona yaxın soydaşımızın yaşamasıdır. Bir də ki, dövlətimiz qonşuluq siyasətində öz müdrikliyini, səmimiliyini daim qoruyur. Lakin, son illər İran iç üzünü o qədər açıq-saçıq göstərir ki, artıq onun hərəkətlərinə cavab verməmək mümkün deyil.
Bu sözləri AZƏRTAC-ın bölgə müxbirinə açıqlamasında “Zaqatala” qəzetinin redaktor müavini, Əməkdar mədəniyyət işçisi Elmira Mehdiyeva söyləyib.
Rayon ziyalısı deyib: “Tehran rejimi hələ də özünü ötən əsrlərdəki kimi hiss edir. Hələ də anlamır ki, Azərbaycan artıq öz müstəqilliyini bərpa edən azad və suveren dövlətdir. Hələ də anlamır ki, onun Azərbaycanın nə daxili işlərinə qarışmağa, nə də xarici siyasətinə söz deməyə heç bir hüququ yoxdur. İranın molla rejimi hərəkətləri ilə İslan dininə kölgə salır, dinin saflığına xələl gətirir. Ötən əsrin əvvəllərində ədiblərimiz dini xurafatı tənqid edəndə məhz bugünkü İransayağı mollaları nəzərdə tuturdular. Yəni, mən deyəni et, mən eləyəni yox”.
Elmira Mehdiyeva bildirib ki, şanlı Ordumuzun Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində əldə etdiyi Qələbəni, torpaqlarımızın işğaldan azad edilməsini İran dövləti həzm edə bilmir. Sanki, torpaqlarımızı ermənilərdən yox, İranın əlindən geri almışıq. Əslində, İran işğal dövründə bu torpaqlarda at oynadıb. Oraları viran qoyanlardan biri də elə İran olub. Ona görə də, bu gün Qarabağda gedən böyük quruculuq işləri, həyata keçirilən iri layihələr İranı qıcıqlandırır. İran dövləti artıq açıq-aydın anti-Azərbaycan siyasəti yeridir və bunun üçün ölkəmizdə yaratdığı şəbəkədən istifadə edir.
Müsahibimiz qeyd edib ki, İran öz siyasətinə çəki-düzən verməsə, terror hərəkətlərinə son qoymasa, onun Ermənistandan heç bir fərqi olmayacaq. İranda səfirliyimizə silahlı hücum edilir, ölən və yaralanan olur, bütün dünyanın gözü qarşısında terror aktı törədilir. İran hökuməti isə susur, sanki bu, belə də olmalıydı.
“İran-Ermənistan arasındakı əməkdaşlıq, Ermənistana göstərilən yardımlar, torpaqlarımızın, məscidlərimizin dağıdılmasına İranın susmasına nə ad vermək olar? Türkiyə, Pakistan və Səudiyyə Ərəbistanı işğalçılıq siyasətinə görə Ermənistanla diplomatik əlaqələri dayandırsa da, İran nə etdi? Ermənistanı dəstəklədi, Azərbaycana qarşı terror və düşmən siyasəti yürütməyə başladı. Bu günlərdə İranın Azərbaycandakı terror şəbəkəsinin ifşa olunması da bunu təsdiqləyir. Zəngəzur dəhlizi məsələsi ciddiləşən kimi İran bir addımlıqda, Qafanda özünün baş konsulluğunu açaraq guya bizlərə meydan oxumağa çalışdı. Sərhədboyu hərbi təlimlərə başladı. Hərbi təyyarələrini qaldırdı. Yəni, Tehran rejiminin ermənipərəst siyasətini artıq özləri də gizlətmirlər. Azərbaycan xalqı bunları heç zaman unutmayacaq. İranın apardığı siyasət onu məhvə sürükləyir”,- deyə ziyalı vurğulayıb.
İranın son təxribatlarına toxunan Elmira Mehdiyeva deyib: “Millət vəkili Fazil Mustafanın evinin qarşısında güllələnməsi artıq İranın ölkəmizin daxilində aparmaq istədiyi dağıdıcı siyasətinin ifşa olunmasının vaxtı gəldiyini göstərdi. İstintaq onu göstərdi ki, ehtimallar doğrudur, bu cinayəti İran Azərbaycanda yaratdığı şəbəkə vasitəsilə reallaşdırıb. İranın Azərbaycanda qurduğu şəbəkənin bütün üzvləri ifşa olunmalı və qanun qarşısında cavab verməlidirlər. Azərbaycan xalqı xəyanəti bağışlamır və heç vaxt bağışlamayacaq. Cənubi Azərbaycanda soydaşlarımız yaşayır. Təbii ki, bizlər onları heç zaman unutmuruq. Xüsusilə Prezident İlham Əliyev bəyan etdi ki, biz hər bir soydaşımızın arxasındayıq. Bəlkə də İranın bugünkü hərəkətləri bir xalqı ikiyə bölən Gülüstan sülh müqaviləsinin sonunun yaxınlaşdığına bir işarədir. Tarix zaman-zaman dəyişir. Böyük şairimiz Bəxtiyar Vahabzadənin dediyi kimi, “Axı dünya fırlanır”.
Bölmənin digər xəbərləri
