İranın gec də olsa Ermənistanın hiyləgər simasını görməsi, ümumi işin xeyrinədir - ŞƏRH
Bakı, 12 sentyabr, AZƏRTAC
Son bir həftə ərzində İran rəsmilərinin dilindən Azərbaycana ünvanlanmış pozitiv mesajlar səsləndirilir. İran Xarici İşlər Nazirliyinin rəsmi nümayəndəsi Nəsir Kənani keçirilən həftəlik mətbuat konfransında Qarabağı Azərbaycanın bir hissəsi adlandırıb və bu fikirləri İranın rəsmi mövqeyi kimi qələmə verib. XİN təmsilçisi öz çıxışı ilə Azərbaycanın 30 il müddətində İrandan gözlədiyi münasibəti nəhayət ki, konkretləşdirib. İki gün öncə isə daha bir diqqətçəkici mesaj İran Silahlı Qüvvələri Baş Qərargahının idarə rəisi, general-mayor Məhəmməd Əhədinin dilindən səsləndirilib. O, İranın Azərbaycanla sərhədə qoşun toplamaq fikrində olmadığını deyib. General-mayor M.Əhədi Azərbaycana səfəri çərçivəsində başçılıq etdiyi heyətlə birgə Bakıda Hərbi Qənimətlər Parkını da ziyarət edib. Vətən müharibəsi dövründə Azərbaycanın Ermənistandan qənimət götürdüyü texnika nümunələri ilə tanış olub. Bütövlükdə bu prosesdə diqqət çəkən ümumi xətt odur ki, İran təmsilçiləri son bir həftə ərzində səsləndirdikləri fikirlərlə məxsusi olaraq Ermənistanın həssas yanaşdığı, rahatsız olduğu məsələlərə toxunurlar. Həmçinin Ermənistanla Azərbaycan arasında mübahisəyə səbəb olmuş mövzularda ölkəmizin haqlı mövqeyini dəstəkləyirmiş kimi görünməyə çalışırlar. Hansı ki, son 30 il müddətində, xüsusi olaraq, İkinci Qarabağ müharibəsi dövründə İran fərqli davranıb, Ermənistanın müdafiəsi yönündə addımlar atıb. İndi onun gözlənilmədən dəyişməsi, Ermənistanın əleyhinə, Azərbaycanın nəfinə açıqlamalar verməsi suallar yaradır.
Bu sözləri AZƏRTAC-a açıqlamasında Mətbuat Şurası İdarə Heyətinin üzvü, media eksperti Müşfiq Ələsgərli söyləyib.
“Ehtimal etmək olar ki, İranın kəskin mövqe dönüşünün səbəbləri Ermənistanın hərəkətlərindən qaynaqlanır. Baş nazir Nikol Paşinyanın qeyri-stabil, prinsipsiz davranışları regionun digər ölkələri kimi, İranı da narazı salır. Belə ki, sentyabrın 11-də Ermənistanda ABŞ-la birgə keçirilən “EAGLE PARTNER 2023” hərbi təlimlərinə start verilib. Sentyabrın 20-nə qədər davam edəcək təlimlər Ermənistan Müdafiə Nazirliyinin “Zar” sülhməramlı briqadasının bazasında keçiriləcək. Rusiya Federasiyası artıq ABŞ-ın iştirakı ilə keçirilən bu təlimlərə öz kəskin etirazını bildirib. Eyni narahatlıq İranın da mövqeyində hiss olunur. İranın vitse-prezidenti Məhəmməd Cəmşidinin tviterdə paylaşımları bunu rəsmən təsdiq edir. O, sosial media paylaşımlarında Ermənistana səslənərək qeyd edib ki, “3+3” formatından kənar ünsiyyət qurmaq, əcnəbilərlə əməkdaşlıq etmək, onlarla hərbi təlimlər keçirmək və şübhəli səfərlərdə görünmək vəziyyəti çətinləşdirir. Görünən budur ki, tviterdə paylaşımlarında təkcə ABŞ-Ermənistan birgə hərbi təlimlərinə deyil, N.Paşinyanın həyat yoldaşı Anna Akopyanın Ukraynaya səfərinə də işarə edilib. Eyni zamanda, Nikol Paşinyanın bu qəbildən olan digər manevrlərindən narazılıq ifadə olunub”, - deyə M.Ələsgərli vurğulayıb.
O qeyd edib ki, Ermənistan artıq mövcud olduğumuz regionda ABŞ və Qərbin hərbi bazasına, kəşfiyyat məntəqəsinə çevrilir. Bu, Rusiya ilə yanaşı, regionun digər dövlətlərini, o cümlədən İranı da narahat edir. Hətta İranı daha artıq rahatsız edir. Çünki Avropa İttifaqı və NATO ölkələrinin “müşahidəçi” adı ilə regiona gətirilən nümayəndələrinin İranla sərhəddə yerləşdirilməsi İran üçün ciddi təhdid yaradır. Beləliklə, N.Paşinyan bir tərəfdən İranı dost, qardaş adlandırır, digər tərəfdən isə “İranın qırmızı xətlərini” tapdalayır. O, “mürəkkəb gedişlər”lə hamını aldada biləcəyini düşünür. Bir zamanlar Azərbaycana qarşı xəyanətkar mövqe sərgiləyən Ermənistan indi eyni münasibəti Rusiya və İrana da göstərir. Həmçinin “Qərbin gücünə” arxalanaraq Rusiya qoşunlarını öz ərazisindən çıxarmağa çalışır, İranı təhdid edir. Bununla da örpəyi düşür, hiyləgər siması görünür. İranın gec də olsa Ermənistanın bu hiyləgər simasını görməsi, ümumi işin xeyrinədir.
Bölmənin digər xəbərləri
