DÜNYA
İRAQDA İNDİYƏDƏK ABŞ-IN 600 ƏSGƏRİ HƏLAK OLMUŞDUR
AZƏRTAC-ın İTAR-TASS agentliyinə istinadla verdiyi xəbərə görə, aprelin 4-də İraqın Ənbar əyalətində iki amerikalı dəniz piyadası qətlə yetirildikdən sonra, ABŞ silahlı qüvvələrinin bu ölkədə itkilərinin sayı 600 nəfərə çatmışdır. Fars körfəzində hərbi əməliyyatlar başlandığı vaxtdan Birləşmiş Ştatların 2988 hərbi qulluqçusu yaralanmışdır.
Pentaqonun məlumatına görə, İraqda ABŞ-ın 410 hərbi qulluqçusu bilavasitə hərbi əməliyyatların gedişində, 190 nəfəri isə digər səbəblərdən, o cümlədən bədbəxt hadisələr və intihar nəticəsində həlak olmuşdur. ABŞ Prezidenti Corc Buşun İraqda “irimiqyaslı hərbi əməliyyatların” başa çatdığını elan etdiyi vaxtdan - 2003-cü il mayın 1-dən bəri münaqişə zonasında 460 ABŞ əsgəri həlak olmuşdur.
Əməliyyatlar zamanı Böyük Britaniya 58, İtaliya 17, İspaniya 8, Bolqarıstan 5, Ukrayna 3, Tailand 2, Danimarka, Estoniya və Polşa hərəsi 1 əsgər itirmişdir.