“İRS” JURNALININ NÖVBƏTİ NÖMRƏSİNDƏ XOCALI FACİƏSİ İŞIQLANDIRILMIŞDIR
AZƏRTAC-ın xüsusi müxbiri xəbər verir ki, “İrs-Naslediye” jurnalının işıq üzü görməsi Xocalı soyqırımının 16-cı ildönümünün qeyd edildiyi kədərli tarixlə bir vaxta düşmüş növbəti nömrəsində doğma yurd-yuvalarından didərgin salınmış xocalılıların beynəlxalq təşkilatlara, məhkəmələrə, dünya dövlətlərinə və xalqlarına müraciəti dərc olunmuşdur. Jurnalda “Xocalı faciəsi rəssamların gözü ilə“ mövzusunda illüstrasiyalar və alim Aslan Xəlilovun azərbaycanlıların soyqırımına münasibəti yer almışdır.
Ənənəvi olaraq jurnalda Qarabağ haqqında materiallar - “Tunc və erkən dəmir dövründə Qarabağ abidələri”, “Qarabağ loğmanları”, habelə “1918-ci ilin martı: azərbaycanlılarsız Azərbaycan”, “VII-IX əsrlərdə Azərbaycanda pul kəsilməsi və tədavülü”, ölkəmizin qədim və zəngin tarixi haqqında başqa materiallar verilmişdir.
Bir sıra maraqlı materiallar, o cümlədən “Müsəlman memarlığının incisi - “sufi ziyarətgahı”, “Azərbaycanda odlu silah istehsalı”, “Neftin dilini bilən rəssam” məqalələri də Azərbaycanın özgür mədəniyyətinə həsr olunmuşdur. Bundan əlavə, Moskvada çıxan və mədəni-maarifçilik mövzusunu işıqlandıran yeni “Baku” jurnalının ünvanına təbrik yer almışdır.
Rusiyadakı bir çox həmvətənlərimizi narahat edən bir mövzuda yazılmış “İkili vətəndaşlıq anlayışı və onun Azərbaycan Respublikası qanunlarında şərhi” məqaləsi də maraq doğurur. Müəllif - Azərbaycan Xarici İşlər Nazirliyinin konsul hüquqi məsələləri şöbəsinin müdiri Rəşad Məmmədov vətəndaş hüququ normalarını ətraflı izah edir, beynəlxalq təcrübədən söhbət açır.
Bölmənin digər xəbərləri
