İspaniya Türkiyənin “Hürjet” təlim-məşq təyyarəsini satın alır
Bakı, 16 may, AZƏRTAC
Bu yaxınlara qədər hərbi sahədə versiyalara səbəb olan məsələ dünən Madriddə üç gün ərzində baş tutan beynəlxalq müdafiə sənayesi və təhlükəsizlik sərgisi – “FEINDEF-2025”də reallaşıb.
AZƏRTAC İspaniyanın “ABC” qəzetinə istinadla xəbər verir ki, sərgidə Hərbi Hava Qüvvələri və Kosmik Qüvvələrin pilotları üçün Türkiyənin “Hürjet” təlim-məşq təyyarəsinin satın alınması üçün ilk addımlar atılıb.
İspan qırıcı təyyarə pilotlarının hazırlanması üçün istifadə edilən F-5 təyyarələrinin dəyişdirilməsi ölkənin Hərbi Hava Qüvvələrinin əsas prioritetlərindən biridir. Təyyarə yarım əsrdir ki, İspaniya Hərbi Hava Qüvvələri üçün F-18 və “Eurofighter” pilotlarını yetişdirmək üçün istifadə olunur, lakin hazırda istismar müddəti başa çatır və onların dəyişdirilməsi zərurəti yaranıb.
İspaniya Müdafiə Nazirliyi bu məqsədlə “Hürjet”i seçib. BBC telekanalı hesab edir ki, bu təyyarə onun ehtiyaclarını tam ödəyir və ispan pilotlarının hərtərəfli hazırlanmasına imkan verəcək.
Hökumətin təsdiq etdiyi müdafiə planına artıq 275 milyon avroluq büdcə daxildir ki, bura da qırıcı təyyarə pilotları üçün 28-30 təkmil təlim təyyarəsi və hərtərəfli yerüstü təlim sistemi daxildir.
Hərbi Hava Qüvvələrinin rəhbərliyi Türkiyədə istehsal olunacaq ilk təyyarənin 2028-ci ildə tədarük ediləcəyini gözləyir. İlk təyyarələrdən sonra Türkiyə ilə texnologiya transferi müqaviləsi çərçivəsində qalan platformalar bütünlükdə İspaniyada istehsal olunacaq.
Bölmənin digər xəbərləri
