İspaniyada yaxın illərdə 200-ə yaxın heyvan növünün nəsli kəsilə bilər
Madrid, 13 iyun, AZƏRTAC
Beynəlxalq Təbiəti və Təbii Sərvətləri Mühafizə İttifaqının (IUCN) məlumatına görə, dünyadakı bütün heyvan və bitki növlərinin 40 mini və ya 28 faizi yox olmaq təhlükəsi ilə üz-üzədir.
İqlim dəyişikliyi, yaşayış yerlərinin məhv edilməsi, ovçuluq və həddindən artıq istismar heyvanların nəslinin kəsilməsinə səbəb ola biləcək səbəblərdir və bunların hamısı insan fəaliyyəti ilə sıx bağlıdır.
AZƏRTAC xəbər verir ki, IUCN-in məlumatına görə, yaxın illərdə İspaniyada 200-ə yaxın heyvan növünün, bəzilərinin isə gözləniləndən tez nəsli kəsilə bilər. Nəsli kəsilməkdə olan növlərə son on ildə populyasiyası 80-90 faiz azalmış Kantabriya quş-sağırı, eləcə də nəhəng kərtənkələ el iyerro, qonur ayı, ağbaş ördək, imperator qartalı, Aralıq dənizi rahib suitisi daxildir.
Bununla belə, müxtəlif bərpa təşəbbüsləri sayəsində sayı artmış növlər var. Bu saqqallı quş və Pireney vaşaqıdır.
Bu məsələ ilə bağlı məlumatlılığı artırmaq, planetə və onun biomüxtəlifliyinə qayğının vacibliyini cəmiyyətə xatırlatmaq üçün İspaniyanın dövlət poçt şirkəti “Correos” dünyanın hər yerindən bu və digər nəsli kəsilməkdə olan heyvanları əks etdirən yeni marka kolleksiyasını təqdim edib.
Nigar Cəfərli
AZƏRTAC-ın xüsusi müxbiri
Madrid
Bölmənin digər xəbərləri
