İsraildə Xocalı soyqırımı qurbanlarının xatirəsi anılıb
Bakı, 25 fevral, AZƏRTAC
İsrailin Afula şəhərində 1992-ci il fevralın 25-dən 26-na keçən gecə törədilən Xocalı soyqırımı qurbanlarının xatirəsinə həsr olunan anım gecəsi keçirilib. Tədbir Afula şəhəri bələdiyyəsinin Absorbsiya İdarəsinin dəstəyi ilə “Azİz” İsrail-Azərbaycan Beynəlxalq Assosiasiyasının Azərbaycan Mədəniyyət Mərkəzi tərəfindən “Justice for Khojaly” kampaniyası çərçivəsində təşkil edilib.
“Azİz” Assosiasiyasından AZƏRTAC-a bildiriblər ki, Azərbaycan Mədəniyyət Mərkəzinin divarlarından Xocalı soyqırımı qurbanlarının şəkilləri və dünya birliyinə Azərbaycanın Xocalı şəhərində kütləvi qırğının səbəbkarları və günahkarları barədə ədalətli qərar qəbul etməyə çağırılan plakatlar asılıb.
Azərbaycan Mədəniyyət Mərkəzinin direktoru Yeganə Salman artıq 23 ildir Azərbaycan xalqının ürəyində sağalmaz yaraya çevrilən faciədən söz açaraq bildirilib ki, erməni silahlı birləşmələri Xocalı şəhərini ələ keçirmək üçün o müdhiş gecə 613 sakini xüsusi amansızlıqla qətlə yetiriblər. Bu qətliam nəticəsində 487 adam əlil olub, əsir düşən 1275 dinc sakin, o cümlədən qocalar, uşaqlar və qadınlar dəhşətli işgəncələrə, təhqirlərə və həqarətlərə məruz qalıb, 250 adamın taleyi hələ də məlum deyil.
Xocalı faciəsi ilə bağlı kədərini və hiddətini bildirən Afula şəhərinin meri İshaq Miron bu hadisələri başqa miqyasda törədilən Holokost ilə müqayisə edib. Mer buna bənzər hadisələrin heç vaxt və heç yerdə təkrarlanmaması üçün bu görünməmiş ədalətsizliyi unutmamağa çağırıb.
Afula şəhəri merinin birinci müavini Mixail Barkan vurğulayıb ki, şəxsən ona Azərbaycan xalqı çox yaxındır. Buna görə də Azərbaycana və azərbaycanlılara münasibətdə hər bir ədalətsizlik onu çox incidir. M.Barkan dost xalq ilə həmrəy olduğunu bildirib.
Afula sakini Tofiq Əlibəyovun çıxışı böyük maraqla qarşılanıb. T.Əlibəyov Qarabağ müharibəsində şəhid olan oğlundan, onun aralarında yəhudilərin də olduğu döyüş dostlarından söz açıb.
Bu tədbirdə iştirak etmək üçün məxsusi olaraq Bakıdan gələn “Azİz” Assosiasiyasının Azərbaycandakı nümayəndəsi Vahid Bayramov bildirib ki, Azərbaycan Ermənistanın işğalçılıq siyasəti ilə heç vaxt barışmayacaq.
Gecədə Afula bələdiyyəsinin Absorbsiya İdarəsinin rəisi Svetlana Çerkasova və Maalota şəhəri merinin müavini Arkadi Pomeranets də çıxış ediblər.
Sonra 1992-ci ilin faciəli fevral hadisələrindən söz açan sənədli film nümayiş etdirilib.
Sonda tədbir iştirakçıları Dağlıq Qarabağda erməni terroru qurbanlarının xatirəsini bir dəqiqəlik sükutla yad ediblər.
Bölmənin digər xəbərləri
