İSTANBULUN MERİ KARPOVLA HEÇ-HEÇƏ OYNAMIŞDIR
İTAR-TASS-dan AZƏRTAC-a daxil olmuş məlumata görə, İstanbulun meri Müfid Gürtün Tuzlada idman kompleksinin açılış mərasimində iştirak etmək üçün fəxri qonaq qismində Türkiyəyə gəlmiş rusiyalı qrossmeyster, şahmat üzrə dəfələrlə dünya çempionu Anatoli Karpovu qəbul etmişdir. Türkiyənin ən böyük şəhərinin başçısı görüşdə bildirmişdir ki, dünyanın ən məşhur şahmatçısının Türkiyəyə gəlişi onun üçün böyük şərəfdir.
Gürtün qeyd etmişdir ki, Karpovun səfəri Türkiyə-Rusiya münasibətlərinin inkişafını sübut edir və bu münasibətlər getdikcə daha çox qeyri-rəsmi olur, yüksək etimadla səciyyələnir.
Rusiyalı qrossmeyster öz növbəsində Bosfor sahillərində yerləşən bu gözəl şəhərə dəvət aldığına və ona Türkiyənin şahmat həvəskarları ilə görüşmək imkanı verildiyinə görə İstanbulun merinə minnətdarlığını bildirmişdir.
Görüşün axırında rusiyalı qrossmeyster və İstanbulun meri şahmat oynamışdır və həmin görüş heç-heçə başa çatmışdır.
Bölmənin digər xəbərləri
