İsveç və Kolumbiya arasında kokain qaçaqmalçılığına qarşı mübarizə haqqında saziş imzalanıb
Stokholm, 29 yanvar, Nərgiz Cəfərli, AZƏRTAC
İsveç və Kolumbiya arasında mütəşəkkil cinayətkarlıq və kokain qaçaqmalçılığı ilə mübarizə sahəsində əməkdaşlıq haqqında saziş imzalanıb.
AZƏRTAC xəbər verir ki, “Polis sazişi” adı ilə tanınan sənəd İsveç xarici işlər naziri Mariya Malmer Stenerqard, Kolumbiyanın ədliyyə naziri Anxela Mariya Buitraqo və Latın Amerikası ölkəsinin müdafiə naziri İvan Velaskes tərəfindən imzalanıb.
Saziş transsərhəd cinayətkarlıq, terrorizm və kibercinayətkarlıqla mübarizədə ölkələr arasında informasiya və təcrübə mübadiləsinin gücləndirilməsini nəzərdə tutur.
İsveç ədliyyə naziri Qunnar Strömmer qeyd edib ki, narkotik vasitələrin ticarəti, xüsusən kokain qaçaqmalçılığı mütəşəkkil cinayətkarlığı maliyyələşdirir. Bu isə ölkə vətəndaşlarının və demokratik institutların təhlükəsizliyinə zərbə vurur. Onun sözlərinə görə, bu problemlərin həllində beynəlxalq əməkdaşlıq aparıcı rol oynayır.
Kolumbiya dünyada kokain istehsalı üzrə ilk yerləri tutur, lakin nəzarətin gücləndirilməsi səbəbindən narkotik vasitələrin böyük hissəsi Ekvador və Venesuela kimi qonşu ölkələr vasitəsilə ixrac edilir.
ABŞ Venesuela Prezidenti Nikolas Maduronu qaçaqmalçılığa dəstək olmaqda ittiham edir və onun həbsinə yardım edəcək məlumat üçün 22 milyon dollardan çox mükafat təyin edib.
Bölmənin digər xəbərləri
