İtaliya musiqiçiləri 19-cu Bakı Caz Festivalında çıxış ediblər
Bakı, 26 oktyabr, Anara Axundova, AZƏRTAC
“Lusi-Zanchini-Masciari” caz triosu (Lusi Canluka (saksofon), Simone Zançini (akkordeon) və Luici Masçiari (gitara) 19-cu Bakı Caz Festivalı çərçivəsində “The Jazz Club”da (“Fairmont”) çıxış edib.
AZƏRTAC xəbər verir ki, tədbiri Bakı Caz Festivalının təsisçisi və bədii rəhbəri Rain Sultanov açıb. İtaliyanın və Azərbaycanın fövqəladə və səlahiyyətli səfiri Luka di Canfrançesko qonaqları salamlayıb.
Gecə çoxlu sayda iştirakçıları - mədəniyyət və incəsənət xadimlərini, caz həvəskarlarını, bakılıları və paytaxtın qonaqlarını bir araya toplayıb. Konsertdən əvvəl qonaqlar rəssam Mədinə Sultanovanın “Jazz and Art Moving Sketches” (“Caz və incəsənət eskizləri”) adlı sərgisi ilə tanış olublar.
Mədinə Sultanova caz musiqisini sevən, yağlı boyalarla tablolar yaradan, qrafika ilə işləyən, həmçinin yaradıcılığında müasir texnologiyalardan istifadə edən gənc rəssamdır.
Mədinə Sultanova AZƏRTAC -ın müxbiri ilə söhbətində sərgidə təqdim olunan əsərlərindən bəhs edib: “Mən bu əsərləri xüsusi olaraq festival üçün hazırlamışam. Proses təxminən iki ay çəkdi. Bunlar məşhur caz musiqiçilərinin portretləridir. Bu əsərlərlə bağlı yaradıcılıq prosesi lentə alınıb. Ona görə də sərgiyə gələnlər rəsmlərin necə ərsəyə gəldiyini dəqiq görürlər. Caz musiqisi mənim uşaqlıq illərimin xatirəsidir. Bu musiqiyə qulaq asaraq böyümüşəm və onun akkordları məni ruhlandırır. Elə bu əsərləri yaradanda da caz musiqisinə qulaq asırdım”.
“Lusi-Zanchini-Masciari” triosu müasir caz ansamblıdır. Onların “Tosky Records” studiyası tərəfindən 2022-ci ildə buraxılmış “Gone” adlı albomu adi ritm bölməsi olmayan eksperimental layihədir. Bu, musiqiçilərə sərbəst improvizasiyalar yaratmağa və yeni musiqi üfüqlərini kəşf etməyə imkan verir.
İtaliyalı sənətçilər 19-cu Bakı Caz Festivalında iştirakla bağlı təəssüratlarını AZƏRTAC-la bölüşüblər: “İlk dəfədir ki, Azərbaycanda oluruq. Çox həyəcanlıyıq. Ölkəniz inanılmaz dərəcədə gözəldir. Bir çox ölkələrdə olmuşuq və burada gördüklərimiz bizi valeh etdi. Bakı çox müasir, inkişaf etmiş şəhərdir. Biz burada özümüzü xoşbəxt hiss edirik. Bu, çox mühüm festivaldır və şadıq ki, biz də onun bir hissəsi olmuşuq. Musiqimizi burada təqdim etmək çox xoşdur. Dəvət üçün Rain Sultanova təşəkkür edirik. Azərbaycan musiqisini də dinləmək istərdik. Dünən gəldiyimiz üçün belə bir imkanımız olmadı. Amma biz onunla tanış olmağa şad olarıq və ümidvarıq ki, bu, bizə qismət olacaq!”
Musiqiçilər “Gone” albomundan orijinal kompozisiyalar təqdim ediblər. Konsert anşlaqla başa çatıb və böyük uğur qazanıb.
Xatırladaq ki, oktyabrın 17-dən 27-dək paytaxtda 19-cu Bakı Caz Festivalı keçirilir. Bu caz bayramında 11 ölkədən olan ifaçılar şəhərin müxtəlif konsert məkanlarında çıxış edirlər. Festival çərçivəsində sərgilər, təqdimatlar və dünya caz ulduzları ilə görüşlər də nəzərdə tutulub.
Bölmənin digər xəbərləri
