İtaliyalı velosipedçi: Bu qələbə komandam üçün başlanğıc mərhələsidir
Naftalan, 13 may, AZƏRTAC
Çətin mərhələ oldu. Əsas çətinlik hava şəraiti ilə bağlı idi. Çünki İtaliyada belə isti hava yoxdur. Amma yollar çox yaxşıdır.
AZƏRTAC xəbər verir ki, bu sözləri "Bakı–Xankəndi" Azərbaycan beynəlxalq velosiped yarışının IV mərhələsinin qalibi olan İtaliyanın "Bardiani" komandasının üzvü Marko Manenti deyib.
Gəncədən Naftalana qədər 152,8 kilometr məsafəni hamıdan tez qət edən italiyalı velosipedçi nəticəyə görə xoşbəxt olduğunu bildirib: "Mərhələnin əvvəlində 3 metrlik məsafə fərqi yarandı. Lakin bunu aradan qaldıra bildim. Sabah da bizi ağır etap gözləyir. Çalışacağıq ki, qalib olduğumuz sprint köynəyini özümüzdə saxlayaq".
İdmançının sözlərinə görə, bu qələbə komandası üçün başlanğıc mərhələsidir: "Düşünürəm ki, daha yaxşı nəticələr əldə edə bilərik. Bu, böyüklər yaş kateqoriyasında ilk ciddi qələbəm oldu".
Qeyd edək ki, "Bakı–Xankəndi" Azərbaycan beynəlxalq velosiped yarışının ilk mərhələsində Çinin "Li-Ninq Star" komandasının belaruslu üzvü Aleksey Şnirko, II və III mərhələdə isə müvafiq olaraq, Qazaxıstanın "XDS Astana" komandasının üzvləri Yevgeni Fyodorov və Qleb Suritsa 1-ci yeri tutublar.
Beynəlxalq Velosipedçilər İttifaqının (UCI) 2.1 kateqoriyalı yarışında dünyanın 20 ölkəsini təmsil edən 24 komanda mübarizə aparır. Beş mərhələdən ibarət olan yarışın ümumi mükafat fondu 50 min avrodan çoxdur. Yarışa mayın 14-də yekun vurulacaq.
Müxbir - Cavid Əliyev
Bölmənin digər xəbərləri
