İzmirdə dağıntılar altından daha 5 nəfərin cəsədi çıxarılıb

İstanbul, 3 noyabr, AZƏRTAC

Türkiyənin İzmir vilayətində baş verən zəlzələ nəticəsində həlak olanların sayı 107-yə çatıb.

AZƏRTAC xəbər verir ki, bu barədə Türkiyənin Fövqəladə Halların İdarə Olunması Agentliyindən (AFAD) bildirilib.

Məlumatda qeyd edilir ki, təbii fəlakət nəticəsində indiyədək xəstəxanalara yerləşdirilən 1027 yaralıdan 144-nün müalicəsi davam etdirilir.

Oktyabrın 30-da baş verən 6,6 bal gücündə zəlzələdən bu gün səhər saat 08:00-dək 1508 afterşok qeydə alınıb. Onlardan 44-ü 4 baldan yüksək olub.

Hadisə zamanı zədələnən və ya dağılan 17 binadan 13-də axtarış-xilasetmə işləri başa çatıb.

İndiyədək 11 min 97 binada araşdırma aparılıb. Bu tikililərdən 124-nün ciddi zədəli olduğu müəyyən edilib.

Günel Məlikova

AZƏRTAC-ın xüsusi müxbiri

İstanbul

MÜƏLLİFLƏ ƏLAQƏ