Ağsu rayonunda şəhərdaxili, respublika və yerli əhəmiyyətli yolların yenidən qurulması istiqamətində ardıcıl tədbirlər görülür. Belə ki, Ağsu-Kürdəmir magistralından Növcü kəndi istiqamətindəki 9,5 kilometrlik yol asfaltlaşdırılmışdır. Rayon icra hakimiyyətində
AZƏRTAC-ın müxbirinə bildirmişlər ki, uzun illərdən bəri təmir edilməyən və gediş-gəliş üçün yararsız vəziyyətdə olan kənd yolunun yenidən qurulması nəinki sakinlərin rahatlığı, habelə ərazidəki kəndlərin sosial-iqtisadi inkişafında böyük rol oynayacaqdır. Bu yoldan Növcü, Axundlu, Çiyni, Ərəbsarvan və Hacıqədirli kəndlərinin sakinləri istifadə edirlər.
Növcü kənd yolunun yenidən qurulması və asfaltlaşdırılması Dövlət Neft Fondunun maliyyə dəstəyi ilə həyata keçirilmişdir.
Şəhərdaxili yolların əsaslı təmiri, yeni asfalt örtüyünün çəkilməsi sahəsində də xeyli işlər görülmüşdür. Heydər Əliyev, 20 Yanvar, Səməd Vurğun küçələri, Şəhidlər Xiyabanına gedən yol tamamilə asfaltlaşdırılmışdır. İşlər Göyçay ixtisaslaşdırılmış asfalt zavodu tərəfindən həyata keçirilmiş və bu məqsədlə 60 min manat məbləğində dövlət vəsaiti xərclənmişdir.
